धोंडेगावचे विभाजन, इंदिरानगर नवीन ग्रामपंचायतीस मान्यता’

‘धोंडेगाव ग्रामपंचायत विसर्जित, लवकरच निवडणुका

नाशिक : तालुक्यातील धोंडेगाव या गु्रप ग्रामपंचायतीतून इंदिरानगर (गाळोशी) या नवीन ग्रामपंचायतीची स्थापना करण्यास राज्य सरकारने मान्यता दिल्याची माहिती गटविकास अधिकारी रवींद्रसिंह परदेशी यांनी दिली. यासंदर्भात अधिसूचना प्रसिद्ध करण्यात आली असून, आता नाशिक तालुक्यात एकूण ६५ ग्रामपंचायती झाल्याचे परदेशी यांनी सांगितले.
धोंडेगाव ग्रामपंचायतीने ३० जून २०१४ रोजी विशेष ग्रामसभा घेऊन धोंडेगाव महसुली गावाची लोकसंख्या २२३६, कश्यपनगर महसुली गावाची लोकसंख्या ८७९ व इंदिरानगर या महसुली गावची लोकसंख्या १८३४ अशी एकूण ५००६ लोकसंख्या असलेल्या ग्रामपंचायतीमधून धोंडेगाव व कश्यपनगर अशी एक ग्रामपंचायत व इंदिरानगर या महसुली गावासाठी स्वतंत्र ग्रामपंचायत स्थापन होण्याबाबतचा ठराव केला होता.
तसा ठराव पंचायत समितीला प्राप्त झाला होता. पंचायत समितीचे विस्तार अधिकारी मनोहर तरवारे व संजय पवार तसेच सहायक गटविकास अधिकारी स्मिता गुजराथी यांनी ठरावाची पडताळणी करून हा ठराव नियमानुसार असल्याने धोंडेगावमधून इंदिरानगर ही स्वतंत्र ग्रामपंचायत स्थापन करण्याबाबत शिफारस केली होती. त्यानुसार पंचायत समितीने सविस्तर प्रस्ताव तयार करून तो जिल्हा परिषदेला सादर केला होता. त्यासाठी सभापती मंदाकिनी निकम व उपसभापती अनिल ढिकले यांनी याबाबत जिल्हा परिषदेकडे पाठपुरावा केला. त्यावर अध्यक्ष विजयश्री चुंभळे व तत्कालीन मुख्य कार्यकारी अधिकारी सुखदेव बनकर व विद्यमान मिलिंद शंभरकर यांनी विभागीय आयुक्त कार्यालयाकडे याबाबतचा प्रस्ताव सादर केला होता. हा प्रस्ताव पुढे शासनाला सादर करण्यात आला होता. आता या प्रस्तावास मान्यता मिळाली असून, तालुक्यातील एकूण ६४ असलेल्या ग्रामपंचायती इंदिरानगर नवीन ग्रामपंचायत झाल्याने संख्या ६५ इतकी झाली आहे. इतकेच नव्हे तर लाडची या ग्रामपंचायतीतून साडगाव ग्रामपंचायत स्थापनेचाही प्रस्ताव शासनाला पाठविला असून लवकरच त्याबाबतही कार्यवाही होणार असल्याचे गटविकास अधिकारी रवींद्रसिंह परदेशी यांनी सांगितले. (प्रतिनिधी)
ओझर टाउनशिप येथे युवकाची आत्महत्त्या
ओझरटाउनशिप : ओझर येथील गणेशनगरमधील युवकाने राहत्या घरात गळफास घेऊन आत्महत्त्या केली.गुरुवारी पहाटेच्या सुमारास दिनेश मनोहर गायकवाड (३५)याने राहत्या घरात बेडरूममधील पंख्याच्या हुकला दोरी बांधून गळफास घेऊन अत्महत्त्या
केली.
घटनेचे वृत्त समजताच पोलीस निरीक्षक श्रीहरी बहिरट यांनी घटनास्थळी धाव घेऊन पंचनामा करून गायकवाड याचा मृतदेह शवविच्छेदनासाठी पिंपळगाव रुग्णालयात पाठविला. आत्महत्त्येचे कारण समजू शकलेले नाही.
या संदर्भात ओझर पोलिसांनी अकस्मात मृत्यूची नोंद केली असून, अधिक तपास ओझर पोलीस करीत आहेत.(वार्ताहर)