शहरातील २०० आंदोलकांवर गुन्हे दाखल

शहरातील २०० आंदोलकांवर गुन्हे दाखल

नाशिक : तळेगाव येथील अत्याचारप्रकरणी रविवारी (दि़९) शहरात आंदोलने होऊन काही ठिकाणी वाहनांची तोडफोड तसेच जाळपोळही करण्यात आली़ याप्रकरणी पोलीस आयुक्तालयातील आडगाव, अंबड, सातपूर, इंदिरानगर, देवळाली कॅम्प यांसह विविध पोलीस ठाण्यांमध्ये सुमारे २०० आदोलकांवर गुन्हे दाखल करण्यात आले आहेत़
पोलीस आयुक्तालयातील अंबड पोलीस ठाणे हद्दीत १५० आंदोलकांवर गुन्हे दाखल करण्यात आले आहेत़ पाथर्डी फाटा येथील शिवाजी पुतळ्यासमोरील आंदोलनास हिंसक वळण लागले. या ठिकाणी काही आंदोलक हे रस्त्यावरील वाहनांना अडवून घोषणाबाजी करीत होते़ या आंदोलनकांना पोलीस उपआयुक्त श्रीकांत धिवरे, सहायक आयुक्त अतुल झेंडे हे समजावून सांगण्यासाठी गेले असता त्यांच्यावर दगडफेक करण्यात आली़ यामध्ये पोलीस उपनिरीक्षक चव्हाण हे जखमी झाले़ याप्रकरणी पोलिसांनी जमावबंदी आदेशाचे उल्लंघन तसेच दगडफेकीचे गुन्हे दाखल करण्यात आले आहेत़ त्यामध्ये पाथर्डी फाटा, पिंपळगाव खांब, राणेनगर, दाढेगाव, चेतनानगर, मोरवाडी येथील आंदोलनकर्त्यांचा समावेश आहे.
नाशिकहून त्र्यंबकेश्वरकडे जाणारी बस (एमएच २०, ८६५४) आंदोलनकर्त्यांनी प्रतीक्षा हॉटेलसमोर अडवून घोषणा देत गाडीच्या काचा फोडल्या. तसेच गाडीचे सीटही पेटवून दिले. याप्रकरणी अज्ञात आंदोलनकर्त्यांवर गुन्हा दाखल करण्यात आला आहे. पाथर्डी फाटा येथे दुपारी ३.४५च्या सुमारास निमाणी ते अंबड (एमएच ४०, ४५५६) ही शहर बस अडवून दगडफेक केली. त्यामध्ये बसचालक संजीव कदम जखमी झाल़े याप्रकरणी कदम यांच्या फिर्यादीवरून इंदिरानगर पोलीस ठाण्यात १२ आंदोलकांविरोधात गुन्हा दाखल करण्यात आला आहे.
देवळाली कॅम्प परिसरात दुपारी ५ वाजेच्या सुमारास शिवडे ते भगूर (एमएच १५ एके ८०६४) या बसवर विजयनगर बस स्टॉपजवळ आंदोलनकर्त्यांनी दगडफेक करून बसच्या काचा फोडल्या़ देवळाली कॅम्प पोलीस ठाण्यात सुमारे २० आंदोलकांविरोधात गुन्हा दाखल करण्यात आला आहे. रात्रीच्या सुमारास महात्मानगर येथील सात चारचाकी वाहनांच्या काचा फोडून नुकसान केले़ या प्रकरणी संत कबीरनगर येथील सहा युवकांवर गंगापूर पोलीस ठाण्यात गुन्हा दाखल करून अटक करण्यात आली आहे़ दरम्यान, सोमवारी (दि़१०) पोलीस ठाण्यांमध्ये आंदोलनकर्त्यांची ओळख पटवून गुन्हे दाखल करण्याचे काम सुरू होते़ (प्रतिनिधी)