मैदाने गजबजली
नंदुरबार : शहरातील विविध भागांतील मैदाने सकाळी आणि सायंकाळी गजबजत आहेत. नागरिक फिरण्याचा व्यायाम करण्यासाठी मैदानांचा आधार घेत आहेत. यात अनेक जण संपूर्ण कुटुंबासह व्यायाम करत असल्याचेही दिसून येत आहे. पहाटे सहा व सायंकाळी सहापासून मैदाने गजबजत आहेत.
जिल्हा बँकेच्या फिरत्या एटीएममुळे दिलासा
नंदुरबार : जिल्हा बँकेने शेतकऱ्यांना ५८ कोटी रुपयांचे कर्ज वाटप यंदा केले आहे. तात्पुरत्या स्वरूपातील रुपे कार्डच्या माध्यमातून हे कर्ज वाटप करण्यात येत आहे. दरम्यान, कर्ज प्राप्त झाल्यानंतर एटीएम गरजेचे असल्याने जिल्हा बँकेने फिरते एटीएम सुविधा सुरू केली आहे. हे एटीएम त्या-त्या शाखांच्या खाली थांबत असल्याने शेतकऱ्यांना पैसे काढण्यात येणारे अडथळे कमी झाले आहेत.
विक्रेते ग्रामीण भागात
नंदुरबार : लाॅकडाऊन शहरे बंद आहेत. यातून रस्त्यांवर विविध वस्तू विक्री करणारे दुचाकीने ग्रामीण भागाकडे जात आहेत. यातून काही अंशी वस्तूंची विक्री होऊन रोजगार कमावता येत असल्याचे त्यांच्याकडून सांगण्यात आले. या फिरस्तीतून बऱ्यापैकी पैसे मिळत असल्याचे सांगण्यात आले.
सर्वेक्षणाला गती
शहादा : तालुक्यातील गावांमध्ये माझे कुटुंब, माझी जबाबदारी मोहिमेंतर्गत सर्वेक्षण मोहीम सुरू करण्यात आली आहे. मोहिमेसाठी गावपातळीवर आरोग्य कर्मचारी, शिक्षक, आशासेविका, अंगणवाडीसेविका, ग्रामसेवक, तलाठी आदी गावात फिरून सर्वेक्षण पूर्ण करत आहेत.
कोथिंबिरीची आवक वाढली
नंदुरबार : तालुक्यातील विविध भागातून बुधवारी बाजारपेठेत काेथंबिरीची मोठी आवक झाली होती. १० रुपयांत तीन जुड्या विकण्याची वेळ विक्रेत्यांवर आली होती. सोबतच पालक, मेथी व पोकळा यांचीही आवक झाल्याचे दिसून आले. बाजारात मंगळवारी भाजीपाला विक्रेत्यांपेक्षा शेतकरीच अधिक दिसून येत होते. स्वस्त अशा त्यांच्या भाजीपाल्याची खरेदी नागरिकांकडून केली गेली.
आमचूरला भाव कमी
धडगाव : आमचूर हंगामाची सांगता येण्याची वेळ येऊनही दर वाढत नसल्याने, आदिवासी बांधव अडचणीत आहेत. दरदिवशी कमी दराने आमचूरची खरेदी होत असल्याने त्यांच्या अडचणी वाढल्या आहेत. दरांबाबत प्रशासनाने योग्य ती भूमिका घेत कारवाईची अपेक्षा व्यक्त होत आहे.
बेशिस्ती कायमच
अक्कलकुवा : शहरातील बाजारपेठेत फिजिकल डिस्टन्सिंग आणि मास्कचा वापर टाळण्याचे प्रकार कायम आहेत. पोलीस प्रशासनाकडून कारवाई होऊनही योग्य ती शिस्त लागत नसल्याचे चित्र आहे. सध्या बाजारात दररोज सकाळी सात वाजेपासून गर्दी उसळत आहे.
मंदाणे येथे सुविध द्या
मंदाणे : शहादा तालुक्यातील मंदाणे प्राथमिक आरोग्य केंद्रात कर्मचारी भरती व इतर सुविधा देण्याची मागणी आहे. या ठिकाणी रिक्त पदांची संख्या मोठी आहे. याबाबत पाठपुरावा करूनही कार्यवाही झालेली नाही. यामुळे रुग्णसेवेवर ताण पडत आहे.
सीमावर्ती भागात चिंता
मंदाणे : शहादा तालुक्यातील मध्य प्रदेश सीमेलगतच्या गावांमध्ये सध्या चिंतेची स्थिती आहे. मध्य प्रदेशात कोरोनास्थिती गंभीर होत आहे. यातून मध्य प्रदेशातील रुग्ण उपचारांसाठी तालुक्याच्या ग्रामीण भागात डाॅक्टरांकडे येत असल्याचे दिसून येत आहे.