कोठार : तळोद्याहून शहादाकडे जाणाऱ्या बसने अचानक पेट घेतल्याची घटना बुधवारी दुपारी पावणेतीन वाजेच्या सुमारास तळोदा शहरातील हरकलाल नगर जवळीस पेट्रोल पंपासमोर घडली. वेळीच आग विझविण्यात आल्याने मोठा अनर्थ टळला. या सर्व प्रकारामुळे ‘द बर्निंग बस’चा थरार अनुभवायला मिळाला.
याबाबत असे की, अक्कलकुवा आगारातून बस क्रमांक एमएच १४- बीटी १७२० ही तळोदामार्गे शहादा येथे जात होती. बुधावारी दुपारी अडीच ते पावणे तीन वाजेच्या सुमारास अवघ्या अर्ध्या किलोमीटरपेक्षा कमी अंतरापर्यत ही बस गेली असता बसचा प्रेशर पाईप फुटला. त्यामुळे जोराचा आवाज झाला व बसच्या खालच्या बाजूने धूर निघू लागला. आवाज झाल्याचे लक्षात आल्यानंतर थोडे अंतर पुढे जाऊन चालक व वाहकाने बस साईडला उभी करे पावेतो धूर निघणाऱ्या भागात बसने पेट घेतला.
यावेळी बसमध्ये ३० ते ३५ प्रवासी होते. बसच्या खालून धूर व आग लागल्याचे पाहून आजूबाजूच्या लोकांनी धाव घेत बसमधून प्रवाशांना तात्काळ खाली उतरविण्यासाठी मदत केली. प्रसंगावधान राखत पेट्रोल पंपावरील अग्निशमन उपकरणाने तात्काळ आग विझविण्यात आल्याने मोठा अनर्थ टळला.
या सर्व प्रकारामुळे प्रवासी मोठ्या प्रमाणात घाबरले होते. प्रवास्यामध्ये लहान मुले, ज्येष्ठ नागरिक, महिला व तरुणांचा समावेश होता. बसला आग लागल्याचे पाहून बघ्यानी मोठ्या प्रमाणात गर्दी केली तर काहींनी मदतीसाठी धाव घेत प्रवाश्यांना खिडकीतून बाहेर काढले तर काहींनी आग विझविण्यासाठी मदत केली.
लखनच्या हिमतीचे कौतुक
बसला आग लागण्याचे पाहून हरकलाल नगर जवळ असणाऱ्या पेट्रोल पंपवर काम करणारा लखन शिवदास वळवी (३०) या तरूणांने हिम्मत दाखवत पेट्रोल पंपावर असलेले अग्निशमन यंत्र घेत बस खाली घुसला व त्याने ती आग विझवली. सुमारे पाच ते आठ मिनिटे ही आग धगधगत होती. परंतु लखनने हिंमत दाखवून ही आग विझविल्याने अनेक प्रवाशांचे जीव वाचले व मोठं नुकसान टाळता आले. लखनने दाखवलेल्या या हिमतीचे प्रवासी व उपस्थितांकडून कौतुक करण्यात येत होते.
बसेसचे फायर ऑडिट व फायर सुरक्षितता ऐरणीवर
या प्रकारामुळे बसेसचे फायर ऑडिट व अग्निशमन सुरक्षिततेचा विषय ऐरणीवर आला आहे. बसला आग लागल्याचे लक्षात आल्यानंतर पेट्रोल पंपावरील अग्निशमन यंत्राच्या मदतीने बसची आग विझवण्यात आली. बसमध्ये अग्निशमन यंत्र होते,परंतु ते फारसे छोट्या स्वरूपातले होते. आगीचे स्वरूप पाहता ते यंत्र निकामी होते. पेट्रोल पंपासमोर बस उभी राहिल्याने आग विझविण्यासाठी पेट्रोल पंपावरील अग्निशमन यंत्र तात्काळ आग विझविण्यासाठी उपलब्ध करता आले. मात्र रस्त्यावर जर इतरत्र बसला अशाप्रकारे आग लागली असती तर बसमधील अग्निशमन यंत्र उपयोगात आले नसते. या सर्व प्रकारामुळे बसच्या फायनल ऑडिटच्या प्रश्न ऐरणीवर आला आहे.
अक्कलकुवापासून तळोदा पर्यत बस व्यवस्थित आली. परंतु तळोदा बसस्थानकातून शहादाकडे मार्गस्थ झाल्यानंतर बसच्या खालून आवाज आला. बस पंचर झाल्याचे वाटले परंतु काही क्षणात बसने खालून पेट घेतल्याने बसमधील प्रवाशांना सुखरूप बाहेर काढण्यात आले. -जी.के. पवार, वाहक
मी बसमध्ये बसलो होतो. अचानकपणे मोठा आवाज झाला व काही वेळानंतर चपलांखाली गरम लागत असल्याची जाणिव झाली. तेवढ्यात बसच्या खालील भागाला आग लागल्याची चर्चा ऐकायला आली व आम्ही घाबरून घाईघाईने बस खाली उतरतो. - शुभम मराठे, प्रवासी