नंदुरबार : होळतर्फे रनाळा येथील शेतकऱ्याचे पपई विक्रीचे तीन लाख ३१ हजार रुपये बुडविल्याप्रकरणी उत्तर प्रदेशातील व्यापारीविरुद्ध गुन्हा दाखल करण्यात आला आहे.
होळतर्फे रनाळा येथील शेतकरी शालीकराव भबूता पाटील यांनी डिसेंबर २०१८ ते फेब्रुवारी २०१९ या काळात आपल्या शेतात उत्पादीत पपई उत्तर प्रदेशातील व्यापारऱ्यास विक्री केली होती. त्यासाठी व्यापारी महमंद हुजेर हाजीभाई कुरेशी, रा.मेरठ, उत्तर प्रदेश हे शेतात येऊन पपई घेऊन गेले होते. पपई विक्रीचे एकुण तीन लाख ३१ हजार रुपये झाले होते. या रक्कमेचा दिलेला चेक बाऊन्स झाला. त्यानंतर शेतकरी पाटील यांनी कुरेशी यांच्याशी वेळोवेळी संपर्क साधून पैशांची मागणी केली. परंतु त्यांनी टाळाटाळ केली.
याबाबत आपण फसविले गेल्याचे लक्षात आल्यावर शालिकराव पाटील यांनी तालुका पोलीस ठाण्यात फिर्याद दाखल केली. त्यांच्या फिर्यादीवरून व्यापारी कुरेशी यांच्याविरुद्ध फसवणुकीचा गुन्हा दाखल करण्यात आला आहे. तपास सहायक पोलीस निरिक्षक एकनाथ पाटील करीत आहे.