नवापूरातून चोरीला गेलेली दुचाकी सापडली

लोकमत न्यूज नेटवर्क
नवापूर : शहरातील नवी महादेव गल्ली परिसरातून नवी मोटरसायकल चोरी गेल्याची घटना सीसीटीव्ही कॅमेरेत  दोन दिवसांपूर्वी कैद झाली होती. याबाबत लोकमतने या घटनेचे सविस्तर वृत्त प्रकाशित केल्यानंतर पोलीस प्रशासनाने अवघ्या काही तासात साक्री तालुक्यातील शिरसोली गावाजवळून दुचाकी जप्त केली आहे.
महादेव गल्लीतील योगेश दिगंबर मराठे यांची दुचाकी चोरीला गेल्याचा सीसीटीव्ही व्हायरल झाला होता. याबाबत लोकमतनेही सविस्तर वृत्त देत चोरीची घटना समोर आणली होती. याची दखल घेत  पोलिस अधिक्षक महेंद्र पंडीत यांच्या मार्गदर्शनाखाली एलसीबीचे  पोलीस निरीक्षक किशोर नवले यांच्या पथकातील पोलीस हेडकॉन्स्टेबल महेंद्र नगराळे, शांतीलाल पाटील, अभय राजपूत यांनी दुचाकीचा शोध सुरु ठेवला होता. दरम्यान लोकमतने प्रकाशित केलेल्या वृत्ताचे कात्रण सोशल मिडियात व्हायरल झाले होते. यातून घाबरलेल्या चोरट्यांनी चोरलेली दुचाकी शिरसोली येथे सोडून पळ काढला होता. शिरसोली येथे चोरीची दुचाकी असल्याची माहिती मिळाल्यानंतर एलसीबीच्या पथकाने शिरसोली शिवार गाठले होते.  याठिकाणी एका गॅरेजलगत दुचाकी आढळून आली होती. 
दुचाकी सापडली असली तरी चोरी करणारे मात्र अद्याप मिळून आलेले नाहीत. चोरट्यांचा शोध घेण्यासाठी पोलीस निरीक्षक विजयसिंग राजपूत यांनी पथक साक्री तालुक्यात रवाना केले असल्याची माहिती आहे.