यासंदर्भात शहादा पोलिसात भरत पुंडलिक उगले (३०) या पोलीस कर्मचाऱ्याने फिर्याद नोंदवून सात आरोपींविरुद्ध गुन्हा दाखल केला आहे. यात दीपक मनोहर कलाल (रा. गणपती गल्ली तळोदा), योगेश दशरथ पाटील (२४, रा. तळोदा), अशोक शनू वाडीले व सुनील अशोक वाडीले (दोघे रा. शहादा जुनी पोस्ट गल्ली, धानका दलपूर), जगन तुकाराम सोनवणे व प्रवीण धानका (दलपूर) हे संशयित आरोपी आहेत. फिर्यादी भरत उगले यांनी वाहन थांबवून जगन सोनवणे यास ताब्यात घेऊन वाहन कुठे नेत आहात व वाहनात काय आहे, अशी विचारपूस करीत असताना दीपक कलाल याने गैरकायद्याने पाच ते सात जण जमा करून पोलीस प्रशासनावर दडपण आणून पोलीस कर्मचाऱ्यास मारहाण केली आहे. यासंदर्भात शहादा पोलिसात शासकीय कामात अडथळा व इतर कायद्यान्वये गुन्हा दाखल करण्यात आला असून, सातही आरोपींना अटक करण्यात आलेली आहे.
शहादा पोलीस निरीक्षक दीपक बुधवंत यांनी मिळालेल्या गुप्त माहितीनुसार रेशनिंगचा माल जप्त केलेला आहे. पोलीस प्रशासनाकडून केलेल्या या कारवाईमुळे रेशनिंग व्यवसाय करणाऱ्या व बाजारात बेकायदेशीर धान्य विक्री करणाऱ्यांचे धाबे दणाणले आहेत. एकीकडे कोविड १९ च्या दुसऱ्या लाटेमुळे जनता हतबल झाली असताना राज्य शासनाने त्यांना मोफत धान्य पुरवठा करण्याचे आदेश दिले आहेत. मात्र, शहादा तालुक्यातील ग्रामीण भागातील काही स्वस्त धान्य दुकानदार रेशनिंगचा तांदूळ व गहू हा काळ्या बाजारात बिनधास्त विकत आहेत. शहादा महसूल प्रशासनाकडून याची दखल घेण्यात यावी, अशी मागणी जनतेतून होत आहे.