यावेळी मुख्य कार्यकारी अधिकारी रघुनाथ गावडे, उपविभागीय अधिकारी महेश सुधळकर, अतिरिक्त मुख्य कार्यकारी अधिकारी शेखर रौंदळ, तहसीलदार भाऊसाहेब थोरात, गटविकास अधिकारी अशोक पटाईत, शिक्षणाधिकारी राहुल चौधरी, तालुका वैद्यकीय अधिकारी जाफर तडवी, सरपंच वासंतीबाई वळवी आदी उपस्थित होते.
जिल्ह्यात आरोग्य विभागासह सर्व यंत्रणा दिवसरात्र काम करीत आहेत. कोरोना नियंत्रणासाठी
नागरिकांच्या सहकार्याची आवश्यकता आहे. लसीकरणामुळे प्रतिकारशक्ती वाढत असल्याने नागरिकांनी मार्गदर्शक सुचनांचे पालन करण्यासोबतच लसीकरणही करून घ्यावे, असे आवाहन जिल्हाधिकारी डॉ. भारुड यांनी यावेळी केले.
लसीकरणाबाबत अफवांवर विश्वास ठेवू नये. लोकप्रतिनिधींनी गावात लसीकरण मोहीम घेण्यासाठी नागरिकांना प्रोत्साहीत करून प्रशासनाला सहकार्य करावे, असे त्यांनी सांगितले. शिबिराच्या आयोजनासाठी त्यांनी गटविकास अधिकारी आणि त्यांचे सहकारी अधिकारी - कर्मचारी, ग्रामपंचायत आणि ग्रामस्थांचे अभिनंदन केले.
लसीकरणासाठी गावाने घेतलेला पुढाकार स्तुत्य असून, जिल्ह्यातील ग्रामीण भागात अशाच स्वरुपाचे शिबिर आयोजित करून अधिकाधिक नागरिकांचे लसीकरण करण्याचा प्रयत्न असल्याचे गावडे म्हणाले. नंदुरबार तालुक्यात आतापर्यंत शिक्षकांच्या सहकार्याने ४५ वर्षांवरील २८ हजार नागरिकांची लसीकरणासाठी नोंदणी करण्यात आली आहे. कोठली गावातील ५०३ ग्रामस्थांनी लसीकरणासाठी नोंदणी केली आहे. ग्रामस्थांचा प्रतिसाद लक्षात घेता गावात तातडीने लसीकरणाची सुविधा उपलब्ध करून देण्यात आली आणि लसीकरण सुरू करण्यात आले आहे. ग्रामीण भागात लसीकरण शिबिर घेण्यासाठी लवकरच
मोबाईल टीमची सुविधादेखील करण्यात येणार आहे, अशी माहिती तहसीलदार थोरात यांनी दिली.
शेजवे येथील बाधितांवर अलगीकरणात उपचार
जिल्हाधिकारी डॉ. भारुड यांनी वरिष्ठ अधिकाऱ्यांसह नंदुरबार तालुक्यातील शेजवे गावाला भेट देऊन अलगीकरण कक्षातील सुविधांची माहिती घेतली. बाधित व्यक्तींवर तातडीने उपचार करण्याच्या आणि लक्षणे असल्यास वरिष्ठ रुग्णालयात संदर्भित करण्याच्या सूचना त्यांनी अधिकाऱ्यांना दिल्या. एकही बाधित व्यक्ती घरी राहणार नाही, याची दक्षता घ्यावी, असे त्यांनी सांगितले.
शनिवारी शेजवे गावातील ८६ व्यक्तिंना कोरोनाचा संसर्ग झाल्याचा अहवाल प्राप्त झाला होता. प्रशासनाने तातडीने गावातील माध्यमिक शाळेत अलगीकरण कक्षाची सुरूवात करून ६२ बाधित व्यक्तिंना या कक्षात दाखल केले. चार व्यक्ती बाहेरगावच्या असून इतरही बाधितांना लवकरच कक्षात दाखल करून त्यांच्यावर उपचार सुरू करण्यात येतील, असे थोरात यांनी सांगितले.