शहादा/ब्राम्हणपुरी : मजुरांना घेऊन जाणारी जीपगाडी ५०० फूट दरीत कोसळून सहाजण ठार तर १० जण जखमी झाल्याची घटना शनिवारी सकाळी साडेनऊ वाजता तोरणमाळ येथील खडकी पॅाईंटनजीक घडली. मयतांमध्ये पाच महिला आहेत. सर्वजण खडकी, ता.धडगाव येथील रहिवासी आहेत.
मयतांमध्ये चिमा धीसा नाईक (३५), बाईजीबाई रेलसिंग नाईक (३८), कुचलीबाई रेलसिंग नाईक (१८), रिमाबाई रायसिंग नाईक (९), सेकडीबाई सायसिंग नाईक (४५), रिंगाटीबाई चिमल्या नाईक (२५) सर्व रा. खडकी, ता.धडगाव तर जखमींमध्ये जखमींमध्ये सुनिता सायिसंग नाईक, भायसिंग सायसिंग नाईक, गोखऱ्या वाहाऱ्या नाईक, बयाना घनश्याम नाईक, गणेश रेवज्या रावताळे, गोखऱ्या वनश्या नाईक, रायमल रेवल्या नाईक, चोमा गिसा नाईक, रेलसिंग जेलसिंग नाईक, आमश्या गोखऱ्या नाईक सर्व रा.खडकी, ता.धडगाव यांचा समावेश आहे.
गुजरातमध्ये मजुरीसाठी हे सर्वजण खडकी येथून जीपगाडीने (क्रमांक एमएच १५-एएस २८९३) तोरणमाळमार्गे गुजरातमधील रोस्का येथे जात होते. सकाळी साडेनऊ वाजता त्यांचे वाहन खडकी घाटातून तोरणमाळ पठाराकडे येत असतांना पठारापासून अवघ्या ३०० मिटर अंतरावर त्यांच्या वाहनाचे ब्रेक फेल झाले. त्यामुळे वाहन मागे घसरू लागले. त्यावेळी काहींनी वाहनातून उड्या मारल्या, परंतु आत बसलेल्या महिला वाहनासह थेट ५०० फूट दरीत कोसळल्या. त्यामुळे गंभीर मार लागल्याने त्यांचा जागीच मृत्यू झाला. जखमींना खोल दरीतून झोळीकरून वर आणण्यात आले. तोरणमाळ आरोग्य केंद्रात प्राथमिक उपचारानंतर जखमींना जिल्हा रुग्णालयात दाखल करण्यात आले आहे. तेथे पालकमंत्री के.सी.पाडवी यांनी त्याची विचारपूस केली. मुख्यमंत्र्यांशी संपर्क साधून त्यांनी मयतांच्या वारसांना पाच लाखांची मदत देण्याची मागणी केली असता मुख्यमंत्री उद्धव ठाकरे यांनी लागलीच पाच लाख मदतीची घोषणा केली.