मागील दोन वर्षांपासून पावसाळा चांगला झाल्यामुळे विहिरी तसेच कूपनलिकांना मुबलक पाणी आहे. त्यामुळे यावर्षीही शेतकऱ्यांनी रब्बी हंगामातील गहू, हरभरा, बाजरी, ज्वारी, भुईमूग तसेच पालेभाज्या अशी विविध पिके घेतली. यापैकी गहू, हरभरा, बाजरी यासारख्या पिकांची काढणी सर्वच शेतकऱ्यांनी यंत्राच्या सहाय्याने केली.
दरवर्षी सर्व शेतकरी खरीपपूर्व व खरीप हंगामातील पिकांसाठी जमिनीची मशागत ट्रॅक्टरच्या सहाय्यानेच करीत असतात. कारण आधुनिक तंत्रज्ञानाच्या युगात बैलजोडीने नांगरणी, वखरणी ही कामे जवळ-जवळ सगळीकडे बंद झाल्याचे दिसून येत आहे. शिवाय सर्व खेड्यापाड्यांमध्ये जनावरांची संख्या बोटांवर मोजण्याइतकीच झालेली आहे. सध्या जयनगरसह पंचक्रोशीतील गावांमध्ये ट्रॅक्टरच्या सहाय्याने नांगरणीचे दर एक हजार ४०० रुपये प्रति एकर असा आहे. तसेच रोटरचे भाव प्रति एकर एक हजार २०० रुपये असा आहे. यावर्षी डिझेलचे दर खूप वाढल्याने ट्रॅक्टर मशागतीचे दरही वाढविण्यात आल्याचे ट्रॅक्टर मालकांकडून सांगण्यात येत आहे. सध्या डिझेलचा दर ८७ रुपये प्रति लिटर असा आहे.
डिझेलचे दर वाढल्यामुळे शेतीची मशागत करीत असताना शेतकऱ्यांना आर्थिक भार सोसावा लागत आहे. नांगरणी, वखरणी, रोटरच्या कामासोबत शेतकऱ्यांकडून शेतातील काडीकचरा तसेच बांधावरील झाडेझुडपे तोडण्याचे कामही सुरू असल्याचे दिसत आहे.
शेतकऱ्यांचे जीवन हे निसर्गावर आणि शासनाच्या धोरणावर अवलंबून असते. कितीही संकटे आली तरी तो मोठ्या धैर्याने सर्व संकटांना सामोरे जाऊन आपले कर्तव्य नेहमीच बजावत असतो. फक्त शासनाने शेतमालाला चांगला भाव देऊन शेतकऱ्यांच्या कष्टाचे चीज करायला हवे. - वैभव राजू पाटील, शेतकरी, जयनगर, ता. शहादा