शहादा तालुक्यातील लोंढरे हे गाव सपाटीवर असले तरी गावात आजवर मोबाइलचे नेटवर्क उपलब्ध नसल्याचा दावा नागरिकांकडून होत आहे. येथून पाच किलोमीटर अंतरावरील निंभोरे व चार किलोमीटर अंतरावरील कहाटूळ येथे मोबाइल नेटवर्क येते. परंतु लोंढरे मात्र यापासून वंचित आहे.
कोरोना महामारीमुळे या शैक्षणिक वर्षात शालेय व महाविद्यालयीन विद्यार्थ्यांचे ऑनलाइन शिक्षण चालूच आहे. रेंज नसल्यामुळे विद्यार्थ्यांनाही ऑनलाइन शिक्षणापासून वंचित राहावे लागत आहे.
केंद्र सरकारने डिजिटल इंडियाच्या धर्तीवर अनेक सेवा ऑनलाइन केल्या आहेत. त्यामध्ये वीजबिल भरणे, पैसे ट्रान्सफर करणे यासारखे अनेक गोष्टी घरबसल्या होत असतात. पण रेंजअभावी ग्राहकांना पैसे ट्रान्सफर करायलाही बँकेतच जावे लागत असल्याचे निदर्शनास येत आहे. फोरजी पॅकेज होऊनही टॉवरमुळे नेटवर्क मिळत नसल्याने ग्राहकांना मनस्ताप सहन करावा लागत आहे. लोंढरे खासगी कंपनीचे टॉवर उभारायला हवे, अशी मागणी ग्रामस्थांकडून होत आहे.
गावाची लोकसंख्या साधारणत: अडीच हजारांपर्यंत आहे. येथे खासगी कंपनीचे ७०० ते ८०० ग्राहक. गावाला कहाटूळ किंवा निंभोरे येथून रेंज भेटत असते, पण त्याची तीव्रता अत्यंत कमी असून, रेंजसाठी आमचे मोबाइल ओट्यावरच टांगावे लागतात. यामुळे येथे टावर सुरू करावा
शांतीलाल रोकडे, पोलीसपाटील, लोंढरे