तळोदा तालुका हा सातपुड्याच्या पायथ्याशी वसलेला तालुका असून, दुर्गम भागातील गावांमध्ये बंगाली डॉक्टरांनी आपले प्रस्थ निर्माण केले आहे. काही बोगस बंगाली डॉक्टर सातपुड्याच्या पायथ्याशी वसलेल्या गावांमध्ये अनेक वर्षांपासून रुग्णांवर अनधिकृतपणे उपचार करीत आहेत. सध्या ग्रामीण भागात कोरोनाचा मोठ्या प्रमाणात प्रादुर्भाव झाला असून, उपचारासाठी या डॉक्टरांकडे मोठ्या प्रमाणात गर्दी दिसून येत आहे. या बोगस डॉक्टरांमध्ये मोठ्या प्रमाणात बंगाली डॉक्टरांचा समावेश असल्याचे सांगितले जात आहे. रुग्णसंख्या मोठ्या प्रमाणात वाढल्याने आरोग्य यंत्रणेवर मोठ्या प्रमाणात ताण वाढला आहे.
दुर्गम व अतिदुर्गम भागात पुरेशा आरोग्य सुविधा नसल्यामुळे व रुग्णालयेही लांब असल्याने हे रुग्ण बोगस डॉक्टरांकडून उपचार करून घेतात. परंतु या डॉक्टरांकडे कोणत्याच प्रकारची पदवी किंवा अधिकृत प्रशिक्षण नसतानाही ते सलाईन आणि इंजेक्शनचा वापर करून रुग्णांची फसवणूक करीत आहेत. सध्या कोरोनाचा प्रादुर्भाव वाढला असून, कोरोना संशयित रुग्णांनाही या डॉक्टरांकडून सरसकट उपचार दिले जात आहेत. ग्रामीण भागात वैद्यकीय सेवा देणारे डॉक्टर कोरोनासदृश रुग्णांना कोरोनाच्या विविध चाचण्या करून घेण्याचा सल्ला देतात. मात्र हे बोगस डॉक्टर रुग्णांना सरसकट उपचार देत असल्याने रुग्णांचा त्यांच्याकडील ओढा वाढला आहे. कोणत्याही चाचणी, तपासणी न करता उपचार मिळतात म्हणून रुग्णांचाही त्यांच्याकडे कल असतो. ग्रामीण भागातील बहुतेक रुग्णांची आर्थिक परिस्थिती बेताची असल्याने त्यांना या डॉक्टरांचे उपचार परवडतात. परंतु थातुरमातुर उपचारांमुळे रुग्णांचा जीव धोक्यात येण्याची शक्यता असते. या डॉक्टरांच्या अशा उपचारामुळे अनेक रुग्णांना जीवही गमवावा लागत असल्याचा प्रकार घडला असल्याचे सांगितले जाते.
दरम्यान, तळोदा तालुक्यातील मालदा येथे कोरोना तपासणी शिबिरात १०८ जणांना कोरोनाची लागण झाल्यानंतर बोगस डॉक्टरांसंदर्भात ओरड सुरू झाली. मालदा येथे वैद्यकीय व्यवसाय करणारा बोगस बंगाली डॉक्टर पॉझिटिव्ह असल्याचा संशय गावकऱ्यांनी व्यक्त केला आहे. त्यानंतर या डॉक्टरवर कारवाई करण्याची मागणी गावकऱ्यांकडून होऊ लागली आहे. तळोदा तालुक्यातील रोझवा पुनर्वसन, राणीपूर या गावांतही अशा बंगाली डॉक्टरांनी आपली दुकाने थाटली असून, रुग्णांवर अनधिकृतपणे उपचार करण्याचा धंदा त्यांनी सुरू केला आहे. याबाबत गावातील काही सूज्ञ नागरिकांनी तोंडी तक्रारी केल्या; मात्र स्वस्त व घरपोच, गावात उपचार मिळत असल्याने तक्रार करणाऱ्या नागरिकांनाही विरोधाला सामोरे जावे लागण्याचा अनुभव आहे.
आमदार राजेश पाडवींचे जिल्हाधिकाऱ्यांना निवेदन
नंदुरबार जिल्ह्यात ग्रामीण भागात कोरोना वाढीस कारणीभूत ठरणाऱ्या व जनतेच्या जिवाशी खेळ करणाऱ्या बोगस डॉक्टरांची चौकशी करून त्यांच्यावर गुन्हे दाखल करण्याची मागणी आमदार राजेश पाडवी यांनी जिल्हाधिकारी व जिल्हा शल्यचिकित्सकांकडे निवेदनाद्वारे केली आहे. तळोदा व शहादा येथील ग्रामीण भागात ना कोणती पदवी ना कुठली शाश्वती असतानादेखील मोठ्या प्रमाणात बोगस डॉक्टर भटकंती करीत आहेत. स्थानिक व आदिवासी भागातील भोळ्या-भाबड्या आदिवासींची आर्थिक लूट करण्यासोबतच त्यांच्या जीविताशीही खेळ करत असल्याचा आरोप आमदार पाडवी यांनी केला आहे. गेल्या अनेक दिवसांपासून आपले बस्तान मांडून असलेले परप्रांतीय बोगस डॉक्टर रुग्णांच्या जिवाशी खेळ करीत आहेत. हा प्रकार धक्कादायक असून, गोरगरीब रुग्णांचा जीव जाण्याची शक्यता असल्याचे निवेदनात म्हटले आहे.
ग्रामीण भागामध्ये बोगस डॉक्टर बॅगा घेऊन फिरत आहेत. अशा बोगस डॉक्टरांकडून नागरिकांनी उपचार घेऊ नये. बोगस डॉक्टरांना गावात येऊ देऊ नये. त्यांच्यावर कारवाई करण्याची मागणी प्रशासनाकडे करण्यात आली आहे.
- आमदार राजेश पाडवी
आमच्या मालदा गावात बंगाली बोगस डॉक्टर आहे. गावात बाहेरचे रुग्ण उपचारासाठी येतात. त्यातील अनेक कोरोना रुग्ण असतात. त्यामुळे गावात संसर्ग वाढला आहे. प्रशासनाकडे त्याची तक्रार करण्यात आली असून, त्यावर कारवाई करावी, अशी मागणी केली आहे.
- गोपी पावरा, ग्रामस्थ, मालदा, ता. तळोदा