अर्धापुरात तहसीलदारांच्या गाडीचा भीषण अपघात! दुचाकीस्वाराला वाचवताना ट्रॅक्टरने दिली धडक

या अपघातात तहसीलदार रेणुकादास देवणीकर यांच्यासह त्यांचे कर्मचारी जखमी झाले आहेत.

- गोविंद टेकाळे
अर्धापूर (नांदेड): अर्धापूर शहरात आज तहसीलदारांच्या शासकीय वाहनाचा आणि ट्रॅक्टरचा भीषण अपघात झाला आहे. या अपघातात तहसीलदार रेणुकादास देवणीकर यांच्यासह त्यांचे कर्मचारी जखमी झाले आहेत. सुदैवाने, या अपघातात मोठी जीवितहानी टळली असली तरी तहसीलदारांचे शासकीय वाहन पूर्णपणे चक्काचूर झाले आहे.

नेमकं काय घडलं? मिळालेल्या माहितीनुसार, रस्त्यावरून एक ट्रॅक्टर जात असताना त्याच्यासमोर अचानक एक दुचाकी आली. या दुचाकीस्वाराचा जीव वाचवण्यासाठी ट्रॅक्टर चालकाने अचानक वळण घेतले. मात्र, वेगामुळे ट्रॅक्टरचा दुभाजकाला धक्का लागला आणि चालकाचे नियंत्रण सुटले. नियंत्रण सुटलेला ट्रॅक्टर विरुद्ध दिशेला गेला आणि त्याच वेळी समोरून येणाऱ्या तहसीलदार रेणुकादास देवणीकर यांच्या शासकीय वाहनावर जोरात धडकला.

नागरिकांचे तातडीचे मदतकार्य
या अपघातात गाडीतील सेवक शेख सलीम यांचा पाय फॅक्चर झाला असून तहसीलदार देवणीकर आणि चालक अरुण वाघमारे हे देखील जखमी झाले आहेत. अपघाताची माहिती मिळताच परिसरातील नागरिकांनी आणि पोलिसांनी घटनास्थळी धाव घेतली. डॉ. आनंद शिंदे, सापोनी विष्णुपंत कराळे यांच्यासह स्थानिक कार्यकर्त्यांनी जखमींना तातडीने गाडीबाहेर काढून ग्रामीण रुग्णालय, अर्धापूर येथे दाखल केले. सध्या जखमींवर उपचार सुरू असून तहसीलदार देवणीकर यांची प्रकृती स्थिर असल्याचे सांगण्यात आले आहे.