मुदखेड (जि. नांदेड) : दुचाकीवरून आलेल्या तीन अज्ञात आरोपींनी गोळी झाडून युवकाचा खून केल्याची घटना तालुक्यातील निवघा येथे शिवाजी पुतळा चौक भागात सोमवारी सकाळी घडली.आरोपींनी या तरुणाला दुचाकीवरून उचलून नेले. यानंतर, या तरुणाचा मृतदेह इजळी शिवारात सापडला. या घटनेमुळे परिसरात खळबळ उडाली आहे. गोळीबार नेमक्या कोणत्या कारणासाठी झाला, हे अद्याप समजू शकले नाही.
निवघा येथील देवीदास माधव पवार (३५) हे शेतकरी सोमवारी सकाळी साडेनऊ वाजेच्या सुमारास शिवाजी पुतळा चौक भागात थांबले होते. यावेळी तिघे जण तेथे आले व त्यांची पवार यांच्यासोबत बाचाबाची झाली. त्यानंतर, आरोपींनी बंदुकीतून त्यांच्यावर गोळी झाडली. जखमी अवस्थेत त्यांना तिघांनी दुचाकीवरून उचलून नेले, अशी माहिती प्रत्यक्षदर्शींनी पोलिसांना दिली. बारड पोलिसांनी घटनास्थळी धाव घेतली असता, पवार यांचा मृतदेह इजळी शिवारात आढळून आला. अप्पर पोलीस अधीक्षक विजय कबाडे यांच्या मार्गदर्शनाखाली उपाधीक्षक बाळासाहेब देशमुख, पोनि.शिवराज तुगावे, उपनिरीक्षक वानोळे हे या प्रकरणाचा तपास करीत आहेत.