तरुणाईची पसंती शासकीय नोकरीलाच

काही वर्षांअगोदर युवकांमध्ये ‘फेव्हरेट’ असणार्‍या खासगी नोकरीचे आकर्षण आता हळूहळू कमी होत असल्याचे चित्र दिसून येत आहे. शासकीय नोकरीतील सुविधा, सवलती

नागपूर : काही वर्षांअगोदर युवकांमध्ये ‘फेव्हरेट’ असणार्‍या खासगी नोकरीचे आकर्षण आता हळूहळू कमी होत असल्याचे चित्र दिसून येत आहे. शासकीय नोकरीतील सुविधा, सवलती आणि सिक्युरिटीमुळे तरुणाईचा सरकारी नोकरीकडे ओढा वाढत आहे. खासगी जॉबमध्ये दांडगे वेतन मिळत असले तरी कामाचा अतिरिक्त ताणदेखील सहन करावा लागतो. शिवाय नोकरी टिकेलच याची शाश्वतीदेखील नसते. परिणामी अभियांत्रिकी, व्यवस्थापन अभ्यासक्रमातील उच्चशिक्षित विद्यार्थीदेखील शासकीय नोकर्‍यांना पसंती देत आहेत. लाखो रुपयांचे पॅकेज देऊन खासगी कंपन्या युवकांना आकर्षित करण्याचा प्रयत्न करीत असतात. विविध महाविद्यालयांतून कॅम्पस इंटरव्ह्यूच्या माध्यमातून खासगी कंपन्या आवश्यक नोकर भरती करताना दिसतात. यासाठी शिकाऊ उमेदवारांनाही तीन ते पाच लाखांपर्यंतचे पॅकेज दिले जाते. मात्र, असे असतानाही शहरातील बहुतांश महाविद्यालयीन तरुणांना दांडग्या पगाराच्या खासगी नोकर्‍यांची नव्हे तर शासनाच्या विविध विभागांतील प्रशासकीय नोकर्‍या करण्याची आवड असल्याचे विद्यार्थी सांगतात. खासगी जॉबसाठी मोठे पॅकेज मिळत असले तरी त्या तुलनेत कामाचा बोजा फार जास्त असतो. खासगी कंपन्यांकडून नोकरदारांना सिक्युरिटी दिली जात नसल्याने कंपनीप्रति कर्मचार्‍यांना आपलेपणा वाटत नाही. शिवाय कंपनी केव्हाही नोकरीवरून काढू शकते. बेरोजगारांची संख्या जास्त असल्याने खासगी क्षेत्रात कर्मचार्‍यांकडून कमी पगारात जास्त काम करून घेतले जाते. अशा परिस्थितीत कर्मचार्‍यांची गुणवत्ता तर खालावतेच; शिवाय त्यांच्यावर मानसिक आणि शारीरिक परिणामदेखील होतो. शासकीय आणि खासगी नोकर्‍यांतील चांगल्या-वाईट गोष्टींबद्दलची जाणीव, फायदे-तोटे युवकांना माहिती होत आहेत. मानसिक समाधान आणि सुरक्षा देणार्‍या नोकर्‍यांकडे आजच्या युवकांचा कल असल्याचे लक्षात येते. शासकीय नोकरीमध्ये सुविधा असतात आणि सुरक्षादेखील. वेतनासह विविध प्रकारचे भत्तेही मिळत असतात. शिवाय खासगी कंपन्यांप्रमाणे कामाचे टेन्शन, टार्गेट नसल्याने युवकांना सरकारी नोकर्‍या आकर्षित करीत आहेत. केंद्रीय आणि राज्य लोकसेवा आयोगाप्रमाणे विविध विभागांतील पदे सरळ भरती प्रक्रियेच्या माध्यमातून निवडले जातात. यामुळे प्रक्रियेत एक प्रकारची पारदर्शकता आली असून युवकांचा विश्वास यातून संपादन झाला आहे. शिवाय शासकीय नोकर्‍या या वशिला आणि शिफारशींऐवजी गुणवत्तेवर मिळत असल्याने तरुणाईचा अशा परीक्षा देण्याकडे कल वाढला असल्याचेही दिसून येते. (प्रतिनिधी)