- मेयोमधून संक्रमित रुग्णाला सूचनेशिवाय पाठविले होते सीसीसीमध्ये
आशिष दुबे/लोकमत न्यूज नेटवर्क
नागपूर : हॉस्पिटलच्या निष्काळजीपणामुळे एका भावाला आपल्या वृद्ध बहिणीच्या शोधात स्मशानघाटापर्यंत भटकंती करावी लागली. दोन दिवसाच्या परिश्रमानंतर भेट झाली आणि पाणावल्या डोळ्यांनी भावाने तिला घरी नेले.
काटोल येथील एका गावातील एक ७५ वर्षीय महिला कोरोना संक्रमणाच्या विळख्यात सापडली. स्थानिक इस्पितळातून तिला नागपुरातील मनपाच्या गांधीनगरस्थित इंदिरा गांधी इस्पितळात १ एप्रिल रोजी पाठविण्यात आले होते. तेथे प्राथमिक उपचार केल्यानंतर त्याच दिवशी त्या महिलेला इंदिरा गांधी शासकीय मेडिकल कॉलेज व हॉस्पिटल(मेयो)मध्ये पाठविण्यात आले. हॉस्पिटलच्या वाॅर्ड क्रमांक ३६ मध्ये उपचार सुरू असलेल्या बहिणीचा हालहवाल घेण्यासाठी भाऊ ८ एप्रिल रोजी मेयोमध्ये पोहोचले. मात्र, तेथे पोहोचल्यावर बहीण तेथे नसल्याची माहिती भावाला मिळाली. वृद्ध बहीण कुठे गेली, याबाबत हॉस्पिटल प्रशासनाला विचारणा केली असता, कोणतेच उत्तर मिळाले नाही. हॉस्पिटलच्या रेकॉर्डनुसार त्यांची बहीण मेयोमध्येच उपचार घेत असल्याचे स्पष्ट होत होते. परंतु, वास्तवात बहीण तेथून गायब होती. त्यामुळे बहिणीचा शोध घेत त्यांनी शहरातील सर्व हॉस्पिटल्समध्ये चकरा मारल्या. बहिणीचा पत्ता लागत नसल्याने त्यांनी स्मशानघाट व कब्रस्तानातही शोध घेतला, परंतु बहिणीचा शोध लागेना. संयोगच म्हणा, मेयो इस्पितळात त्यांना एक ॲम्ब्युलन्स चालक भेटला. त्याने त्यांची बहीण पाचपावली येथील कोविड केअर सेंटरमध्ये असल्याचे सांगितले.
----------
तात्काळ गाठले सेंटर आणि नेले घरी
पीडित वृद्ध बहिणीच्या भावाच्या सांगण्यानुसार ड्रायव्हरने दिलेल्या माहितीनुसार ते तात्काळ पाचपावली येथील कोविड केअर सेंटरमध्ये पोहोचले. तेथे रेकॉर्ड तपासल्यावर त्यांच्या बहिणीचा थांगपत्ता लागेना. अखेर जोखीम पत्करत त्यांनी वाॅर्डात प्रवेश केला आणि बहिणीचा शोध घेतला. तेव्हा त्यांना त्यांची वृद्ध बहीण सापडली. डॉक्टरांशी संवाद साधून त्यांनी तात्काळ आपल्या बहिणीचा डिस्चार्ज मिळविला आणि सोबत आपल्या घरी नेले.
-------
रेकॉर्ड सगळ्यांचाच असतो
यासंदर्भात मेयोचे डॉ. सागर पांडे यांच्याशी संपर्क साधला असता त्यांनी इस्पितळात रुग्ण येण्यापासून ते जाईपर्यंत, सगळीच माहिती रेकॉर्डमध्ये नोंदविली जाते. रुग्णांच्या नातेवाईकांनी विचारले असता त्यांना माहिती दिली जाते. संबंधित वृद्ध महिलेला पाचपावली सेंटरमध्ये पाठविण्यात आल्याचा रेकॉर्डही हॉस्पिटलमध्ये होता, असे ते म्हणाले.
..............