सांगा, किती लोकांना चावले कुत्रे !

राज्यामध्ये गेल्या वर्षभरात किती लोकांना मोकाट कुत्रे चावले याची आकडेवारी सादर करण्याचे आदेश मुंबई उच्च न्यायालयाच्या नागपूर खंडपीठाने बुधवारी शासनाला दिलेत. तसेच,

हायकोर्ट : आकडेवारी देण्याचे शासनाला निर्देश
नागपूर : राज्यामध्ये गेल्या वर्षभरात किती लोकांना मोकाट कुत्रे चावले याची आकडेवारी सादर करण्याचे आदेश मुंबई उच्च न्यायालयाच्या नागपूर खंडपीठाने बुधवारी शासनाला दिलेत. तसेच, मोकाट कुत्र्यांवर नियंत्रण मिळविण्यासाठी काय उपाययोजना केल्या जात आहेत, यावर महानगरपालिकेला माहिती देण्यास सांगितले.
शहरात मोकाट कुत्रे हैदोस घालत असल्यामुळे अनिरुद्ध गुप्ते व इतरांनी जनहित याचिका दाखल केली आहे. याचिकेवर न्यायमूर्तीद्वय भूषण गवई व मृदुला भटकर यांच्यासमक्ष सुनावणी झाली. महानगरपालिका कारवाई करीत नसल्यामुळे मोकाट कुत्र्यांची संख्या वाढली आहे.
रस्त्याने जाणाऱ्या वाहनांवर कुत्र्यांच्या टोळ्या झडप घालतात. मोटरसायकल असल्यास चालक एकतर करकचून ब्रेक दाबतो किंवा कुत्रे चावण्याच्या भीतीमुळे गाडीसह रोडवर कोसळतो. अशावेळी मागून येणारी वाहनेही एकमेकांवर आदळतात. मोकाट कुत्र्यांची रात्री सर्वाधिक भीती असते. शासकीय इमारती व रुग्णालयांमध्ये मोकाट कुत्र्यांचा मुक्त संचार असतो. मेडिकलमध्ये नवजात बाळांना कुत्र्यांनी कुरतडून खाल्ल्याच्या घटना घडल्या आहेत. यासंदर्भात महानगरपालिकेने गंभीरतेने उपाययोजना करणे आवश्यक आहे, असे याचिकाकर्त्यांचे म्हणणे आहे. याचिकाकर्त्यांतर्फे अ‍ॅड. फिरदोस मिर्झा यांनी बाजू मांडली. (प्रतिनिधी)