बाल्या बोरकर यांनी बजावले : शिबिराला कर्मचारी येतात उशिरा
नागपूर : नागरिकांना मालमत्तेवर कर लावून घेता यावा, महापालिकेच्या उत्पन्नातही भर पडावी या उद्देशाने स्थायी समितीचे अध्यक्ष बाल्या बोरकर यांनी सुरू केलेल्या शिबिराला कर विभागातील अधिकारी व कर्मचार्यांनीच सुरुंग लावला आहे. शिबिर सकाळी ८ वाजता सुरू होत असताना कर्मचारी मात्र १० वाजता येत आहेत. अधिकार्यांनीही शिबिर गांभीर्याने घेतलेले नाही. नागरिकांना पाहिजे तसे सहकार्य मिळत नाही, अशी निरीक्षणे नोंदवित बोरकर यांनी या एकूणच कारभारावर नाराजी व्यक्त केली. बोरकर यांच्या निर्देशानुसार तीन दिवसीय कर आकारणी व नामांतरण शिबिर आयोजित करण्यात आले आहे. आज शिबिराचा दुसरा दिवस होता. दहाही झोनमध्ये पहिल्या दिवशी १० लाख रुपयांचे उत्पन्न मिळाले. आज दुसर्या दिवशी ३६ लाख ५८ हजार रुपयांची कर वसुली झाली. नामांतरणाची प्रकरणे निकाली काढल्याने १ लाख २० हजार रुपये मिळाले. धरमपेठ, धंतोली, गांधीबाग परिसरात मोठ्या वसुलीची अपेक्षा फोल ठरली. शिबिराचीे वेळ सकाळी ८ वाजतापासून आहे. मात्र, या झोनमधील कर्मचारी १० वाजता शिबिरात येत आहेत. लकडगंज झोनमध्य आपण पुढाकार घेतल्याने २७६ अर्जापैकी ६५ अर्ज निकाली काढण्यात आल्याचे त्यांनी सांगितले. शिबिराच्या जनजागृतीसाठी पत्रके वितरित करणे, आॅटो फिरवून भोंग्याने लोकापर्यंत शिबिराचे माहिती पोहोचवण्यातही कर्मचारी अपयशी ठरले. शिबिर अंतर्गत वस्त्यांमध्ये लावणे अपेक्षित असताना अनेक कर्मचार्यांनी स्वत:च्या सोयीसाठी मुख्य रस्त्यांवर शिबिर लावले. त्यामुळे नागरिकांचा फारसा प्रतिसाद मिळाला नाही, असेही त्यांनी स्पष्ट केले. लक्ष्मीनगर, हनुमाननगर, धंतोली, नेहरूनगर, सतरंजीपुरा या झोनमध्ये कर आकारणीसाठी आलेल्या अर्जावर कर्मचार्यांनी कुठलीही कारवाई केली नाही. याची गंभीर दखल घेतली जाईल,असा इशारा त्यांनी दिला. शिबिराचा कालावधी आणखी दोन दिवस वाढविण्याचे संकेत त्यांनी दिले. गेल्या दोन दिवसांत शिबिरामुळे महापालिकेच्या उत्पन्नात ४६ लाख ६५ हजार रुपयांची भर पडली आहे. (प्रतिनिधी)