एसटी महामंडळाकडून आता सवलतधारकांसाठी ‘एनसीएमसी’ स्मार्ट; कार्ड रिचार्जचीही व्यवस्था

एसटी प्रवासाच्या सवलतींचा लाभ घेण्यासाठी यापुढे हे स्मार्ट कार्ड अनिवार्य राहणार असून कार्ड मिळवण्यासाठी महामंडळाने तीन हजारांवर एजंट नियुक्त केल्याची माहिती आहे.

 

नागपूर : महाराष्ट्र राज्य मार्ग परिवहन महामंडळाने आता सवलतधारक प्रवाशांसाठी ‘नॅशनल कॉमन मोबिलिटी कार्ड’ (एनसीएमसी) सुरू करण्याचा निर्णय घेतला आहे. एसटी प्रवासाच्या सवलतींचा लाभ घेण्यासाठी यापुढे हे स्मार्ट कार्ड अनिवार्य राहणार असून कार्ड मिळवण्यासाठी महामंडळाने तीन हजारांवर एजंट नियुक्त केल्याची माहिती आहे.

रोख व्यवहारांच्या चौकटीपलीकडे जाऊन पारदर्शक, सुरक्षित आणि सोयीस्कर सेवा देण्याच्या उद्देशाने ही प्रणाली सुरू करण्यात येणार असल्याचे महामंडळाकडून स्पष्ट करण्यात आले आहे. सवलतींची अचूक नोंद, पारदर्शक प्रतिपूर्ती आणि रोखविरहित व्यवहार या तिन्ही बाबी एका स्मार्ट कार्डच्या माध्यमातून एकत्रित केल्या जाणार असल्याचा दावा अधिकारी करीत आहेत. ही योजना पूर्ण करण्यासाठी महामंडळाने मे. ईबिक्स टेक्नोलॉजिस लि. आणि एनएसडीएल पेमेंट्स बँक यांच्याशी करार केला आहे. त्यानुसार, राज्यातील सर्व आगारांमध्ये या कार्डसाठी नोंदणी सुरू केली जाणार आहे. एनसीएमसी कार्ड १९९ रुपयांत दिले जाणार असून जुने स्मार्ट कार्ड जमा केल्यास १४९ रुपयांत नवीन कार्ड दिले जाईल. याची वॉलेट मर्यादा किमान १०० रुपये ते कमाल ५०० रुपये इतकी ठेवता येईल. शिवाय आवश्यकतेनुसार ५० रुपयांच्या पटीत कार्ड रिचार्ज करता येणार आहे. ईटीआयएम मशीन, अधिकृत संकेतस्थळ, मोबाईल ॲप किंवा नियुक्त एजंटच्या माध्यमातून हे कार्ड रिचार्ज करता येईल.

एनसीएमसी कार्ड कुणासाठी? -
या योजनेत समाजातील विविध घटकांचा समावेश करण्यात आला आहे. त्यात शालेय व तांत्रिक शिक्षण घेणाऱ्या विद्यार्थ्यांना त्यांच्या ‘सरल’ क्रमांकाशी संलग्न कार्ड दिले जाणार आहे. अमृत ज्येष्ठ नागरिक, सर्वसाधारण ज्येष्ठ नागरिक तसेच महिला प्रवाशांना आधारसंलग्न स्मार्ट कार्ड देण्यात येणार आहे. दिव्यांग प्रवाशांना यूडीआयडी क्रमांकाशी जोडलेले कार्ड उपलब्ध करून दिले जाणार आहे. त्याचप्रमाणे स्वातंत्र्य संग्राम सैनिक, अधिस्वीकृतीधारक पत्रकार आणि राज्यस्तरीय पुरस्कार विजेत्यांना विभागीय कार्यालयातील मुख्यालयामार्फत या कार्डचे वितरण केले जाणार आहे.

बसस्थानकांवरच नोंदणीची प्रक्रिया -
ज्येष्ठ नागरिक आणि महिलांच्या सोयीसाठी महामंडळाकडून राज्यभरात ३००० हून अधिक एजंट नियुक्त करण्यात आले आहेत. बसस्थानकांवरच नोंदणीची प्रक्रिया पूर्ण करता येणार असल्याचा दावा महामंडळाकडून करण्यात आला आहे. विशेष उल्लेखनीय म्हणजे, महामंडळाने यापूर्वी सवलतीधारक प्रवाशांसाठी स्मार्ट कार्ड योजना सुरू केली होती. मात्र, काही महिन्यातच या योजनेचा बोजवारा उडाला.

आणखी तीन महिने प्रतिक्षा -
या संबंधाने अधिक माहिती जाणून घेण्यासाठी एसटीचे विभागीय व्यवस्थापक श्रीकांत गभणे यांच्याकडे संपर्क केला असता त्यांनी ही योजना सुरू व्हायला आणखी दोन ते तीन महिन्यांचा अवधी लागेल, असे सांगितले.