नागपूर : ती येणार, येणार म्हणून आवई उठली. त्यामुळे सर्वत्र बोलबाला झाला. अनेकांनी तिच्या संबंधाने अनेकांकडे विचारणा केली. मात्र, ज्यांनी तिचे यजमानत्व पत्करले, ते तिच्या येण्याबद्दल चकार शब्दही काढायला तयार नव्हते. त्यामुळे दोन तीन दिवस संशयकल्लोळ होता. अखेर ती आली. रात्रीच्या अंधारात, अगदी लाजतमुरडत. आता तिला बघण्यासाठी, तिच्या सानिध्याची अनेकांना ओढ लागली आहे.
तिचे वय तसे जास्त नाही. १५ फेब्रुवारी २०१९ ला ती अवतरली. आधी नवी दिल्ली आणि तेथून ती वाराणसीकडे झेपावली. काही दिवसानंतर नवी दिल्लीहून श्री वैष्णोदेवी माता दर्शनासाठी कटराकडे निघाली. नंतर मुंबईहून थेट गांधीनगर (गुजरात)कडे धावली. त्यानंतर भारताच्या अनेक प्रांताला तिने गवसणी घातली.
दरम्यान, अवघ्या पावणेचार वर्षांत तिने अनेकांना त्यांच्या त्यांच्या आवडीच्या ठिकाणी सोडून त्यांची वाहवा मिळवली. त्यामुळे ती बेधडक आहे, सैराट आहे. एकदा निघाली की वाऱ्यावरच स्वार होते, असे काैतुकोद्गार तिच्यासाठी निघू लागले. दुसरीकडे ती नाजूक आहे, बेधडक असली तरी कुणाचे धडकने ती सहन करू शकत नाही, अशी कुजबुजही सुरू झाली. तिच्या एकूणच ख्याती-स्थितीची सर्वत्र चर्चा झाल्याने ती साऱ्यांच्याच आकर्षणाचा विषय ठरली. त्यामुळे तिच्या नुसत्या येण्याच्या चर्चेनेच अनेकांचे कान टवकारले जाते.
आता देशाच्या हृदयस्थळी ती येणार, नमन करणार, अशी आवई गेल्या आठवड्यात उठली अन् नागपूरच नव्हे तर मध्यभारतातील यंत्रणा सजग झाली. ज्यांनी तिच्यासाठी शामियाना घालण्याचे ठरवले, ते मात्र चुप्पी साधून होते. त्यामुळे तिच्या येण्याबाबतचे कुतुहल जास्तच वाढले. अखेर दोन दिवसांपूर्वी ती येणार हे निश्चिंत झाले अन् नागपूरसह संपूर्ण महाराष्ट्र तिच्या स्वागतासाठी सज्ज झाला. तिच्या आगमनात कसलाही व्यत्यय येऊ नये म्हणून दिल्लीचा स्पेशल प्रोटेक्शन ग्रुप (एसपीजी) आला. मुंबईहून नॅशनल सिक्युरिटी ग्रुप (एनएसजी)चे कमांडो आले.
फोर्स वनही आली. हेच काय खुद्द देशाचे पंतप्रधान नरेंद्र मोदीही तिला हिरवी झेंडी दाखवण्यासाठी येणार आहे. या सर्व पार्श्वभूमीवर, नागपुरात जोरदार तयारी सुरू आहे. जेथे येणार त्या रेल्वेस्थानकाला संपुर्ण खाकीने सुरक्षा कवच घातले आहे. असे सर्व उत्साही आणि भारावलेले वातावरण असताना ती नियोजित वेळेच्या ३६ तासांपूर्वीच शुक्रवारी रात्री नागपुरात आली, अगदी लाजतमुरडत. होय, तिच ती वंदे भारत ट्रेन आलीय !
बंदुकधाऱ्यांच्या गराड्यात सुरू आहे तिचे नटणेथटणे
तिचे रुप अनेकांना मोहित करणारे आहे. रात्री तिच्या आगमनानंतर यजमानांनी तिचे नागपुरात छोटेखानी स्वागत केले अन् तिच्या मुक्कामाची व्यवस्था असलेल्या रेल्वे यार्डात तिला पाठविण्यात आले. तिच्या सुरक्षेसाठी चोहोबाजूने सशस्त्र सुरक्षा रक्षक तैनात करण्यात आले आहे. बंदुकधाऱ्यांच्या गराड्यात तिचे नटणेथटणे सुरू आहे. त्यासाठी विशेष मेकअपमन अन् साजसज्जा बोलविण्यात आली आहे. रविवारी सकाळी ती रेल्वेस्थानकावर येईल. अगदी नवरीसारखी नटून थटून. त्यानंतर प्रधानमंत्री नरेंद्र मोदी स्वत: तिचे स्वागत करून तिला पुढच्या वाटचालीसाठी शुभेच्छांचा ग्रीन सिग्नल देणार आहे.