नागपूर : बजाजनगर पोलिसांनी चोरी, घरफोडी आणि लूटमारीच्या पाच घटनांचा छडा लावून चार आरोपींना अटक केली असून तीन अल्पवयीन आरोपींना ताब्यात घेतले आहे.
वनिता मातादिन मोरे (५१) आणि पूजा सुनील भोवरे (२५, रा. डिप्टी सिग्नल) या ३० ऑगस्टला चित्रकला महाविद्यालयाजवळ चोरी करताना रंगेहाथ सापडल्या. तसेच लक्ष्मीनगरच्या बांधकाम सुरू असलेल्या इमारतीत काम करीत असलेल्या मजुराचा मोबाइल चोरी करणाऱ्या दोन अल्पवयीन मुलांना पकडण्यात आले आहे. सुरेंद्रनगर येथील रहिवासी किशोर जाजू २५ ऑगस्टला रात्री घराजवळ फिरत होते. त्यांचा मोबाइल ॲक्टिव्हावर आलेल्या दोन आरोपींनी हिसकावून पळ काढला होता. २४ ऑगस्टला वकील सुमंत देवपुजारी शंकरनगर चौकातून दुचाकीने जात होते. त्यांच्या खिशातून मोबाइल चोरी करण्यात आला. दोन्ही घटनांत तपिश राहुल बागडे (१९, रा. हरिजन कॉलनी, बेझनबाग) आणि वृषभ चंद्रशेखर कावळे (२०, रा. नझुल ले आऊट) यांना त्यांच्या अल्पवयीन साथीदारासह पकडण्यात आले. पोलिसांनी आरोपींकडून २ लाखाचा मुद्देमाल जप्त केला आहे. ही कारवाई पोलीस उपायुक्त नुरुल हसन यांच्या मार्गदर्शनाखाली निरीक्षक शुभांगी देशमुख, उपनिरीक्षक पराग फुलझेले, शीतल राणे, दिशा पाटील, गोविंदा बारापात्रे, गौतम रामटेके, अरुण कांबे, सतीश ठाकूर, विनोद द्विवेदी, अमित गिरडकर, सुरेश वरुडकर, सुभाष गजभिये यांनी केली.
.............