रेमडेसिविर काळाबाजारीत पुन्हा चौघांना बेड्या

लोकमत न्यूज नेटवर्क

नागपूर : रेमडेसिविर काळाबाजार प्रकरणात पोलिसांनी आज सावंगी मेघे (वर्धा) तसेच नागपुरातील शुअरटेक हॉस्पिटलमधील वाॅर्ड बॉयसह चाैघांना अटक करून ४ रेमडेसिविर इंजेक्शन जप्त केले. शनिवारी सायंकाळी जरीपटक्यात या संंबंधाने दुसरा गुन्हा दाखल करण्यात आला. वृत्त लिहिस्तोवर ठिकठिकाणच्या १५ ते २० जणांची चौकशी सुरू होती. या कारवाईमुळे वैद्यकीय वर्तुळात प्रचंड खळबळ उडाली आहे.

कोरोनाचा उद्रेक झाल्यामुळे रुग्णांना सरकारी अथवा खासगी इस्पितळात बेड मिळणे कठीण झाले आहे. बेड मिळाला तर ऑक्सिजन, रेमडेसिविर आणि अन्य औषधोपचाराची मारामार आहे. काही इस्पितळातील डॉक्टर परिस्थितीची जाण असूनही रुग्णाच्या नातेवाईकाला रेमडेसिविर बाहेरून आणायचे सांगत आहे. ते मिळाले नाही तर रुग्णाचा जीव धोक्यात येईल, असे सांगत आहे. दुसरीकडे मृताच्या टाळूवरचे लोणी खाण्याची वृत्ती बाळगणारे भामटे रेमडेसिविरचा काळाबाजार करीत आहेत. ४ ते ५ हजारांचे इंजेक्शन २२ ते २५ हजारांत विकत आहेत. ‘मरता क्या न करता’ अशी स्थिती असल्याने रुग्णांचे नातेवाईक तेवढी रक्कम मोजायला तयार असल्यामुळे रेमडेसिविरच्या ब्लॅकमार्केटिंगला जोर चढला होता. या गंभीर प्रकाराची तेवढ्याच गंभीरपणे दखल घेत पोलीस आयुक्त अमितेशकुमार यांनी काही इनपूटसह परिमंडळ पाचचे पोलीस उपायुक्त निलोत्पल यांना या प्रकरणाच्या तपासाची जबाबदारी दिली. त्यानुसार, उपायुक्त निलोत्पल यांनी सापळा रचून डमी ग्राहकाच्या माध्यमातून गुरुवारी सायंकाळी रेमडेसिविरच्या काळाबाजारीत सक्रिय असलेला डॉ. लोकेश शाहू आशा (आशा हॉस्पिटल, कामठी) याला ब्लॅकमध्ये रेमडेसिविर इंजेक्शन विकताना रंगेहात पकडले. त्याच्या माहितीवरून वाॅर्डबॉय शुभम मोहदुरे आणि कुणाल कोहळे (स्वस्थम हॉस्पिटल, वर्धा रोड) आणि सुमित बागडे (दत्ता मेघे हॉस्पिटल, वानाडोंगरी) यांनाही बेड्या ठोकल्या. सध्या ते पीसीआरमध्ये असून त्यांनी दिलेल्या माहितीवरून पोलिसांनी आज वर्धा (सावंगी) येथील दत्ता मेघे हॉस्पिटलचा कर्मचारी सातपुते याला पकडले. त्याने दिलेल्या माहितीनुसार, १५ ते २० जणांची चौकशी सुरू केली.

----

स्वयंकथित पत्रकारासह तिघे जेरबंद

पोलिसांनी केलेल्या या दणकेबाज कारवाईमुळे अनेक पीडितांना दिलासा मिळाला. त्यातील एकाने शुक्रवारी सायंकाळी पोलीस आयुक्त अमितेशकुमार यांना एका ब्लॅकमार्केटरची माहिती दिली. ती उपायुक्त नीलोत्पल यांना कळली. त्यानंतर शुक्रवारी मध्यरात्री पुन्हा सापळा रचला. उपायुक्त नीलोत्पल यांच्या विशेष पथकातील एपीआय भिसे, पीएसआय देवकते तसेच जरीपटक्याचे ठाणेदार नितीन फटांगरे यांनी विवेक ढाकणे पाटीलकडे संपर्क साधला. ४६ हजारांत दोन रेमडेसिविर देण्याची तयारी दाखवून हा भामटा मध्यरात्री मार्टीननगरात पोहचला. तेथे पोलीस पथकाने त्याच्या मुसक्या बांधल्या. त्याच्याकडून दोन रेमडेसिविर जप्त करण्यात आले. त्याने दिलेल्या माहिवरून नंतर अमन शिंदे तसेच शुअरटेक हॉस्पिटलचा वाॅर्ड बॉय ईश्वर ऊर्फ बिट्टू या दोघांना अटक करून त्यांच्याकडूनही दोन रेमडेसिविर जप्त करण्यात आले. विवेक पाटील नावाचा हा भामटा स्वताला एका न्यूज पोर्टलचा पत्रकार म्हणवून घेतो. त्याची क्रेटा कार, अन्य आरोपींच्या दोन बाईक, मोबाईल्स आणि रोख १३ हजार असा एकूण ६ लाख, ५५ हजारांचा मुद्देमाल पोलिसांनी जप्त केला.

----

ते १५ रेमडेसिविर जिल्हाधिकाऱ्यांना सोपविले

दरम्यान, गुरुवारी रात्री जप्त करण्यात आलेले १५ रेमडेसिविर पोलिसांनी न्यायालयाची परवानगी घेऊन जिल्हाधिकारी रवींद्र ठाकरे यांना सोपविले. आणीबाणीच्या काळात ते गरजूंच्या उपयोगात येणार आहेत. पोलिसांच्या या दणकेबाज कारवाईमुळे सर्वत्र काैतुक होत आहे. आणखी अनेक जण कारवाईत अडकण्याचे संकेत पोलीस उपायुक्त नीलोत्पल यांनी दिले आहे.

---