-----
तरुणासह दोघांनी लावला गळफास
नागपूर : यशोधरानगरातील एका तरुणासह दोघांनी गळफास लावून आत्महत्या केली. जयश भीमराव निकोसे (वय २९) असे यशोधरानगरातील तरुणाचे नाव आहे. रोजमजुरी करून उदरनिर्वाह करणारा जयश त्याच्या पत्नीसोबत कामठी नाका नंबर २ जवळ साईनगरमध्ये राहत होता. गुरुवारी दुपारी १२ ते १२.३० च्या सुमारास त्याने गळफास लावून आत्महत्या केली. त्याची पत्नी प्रियंका जयश निकोसे हिने दिलेल्या सूचनेवरून यशोधरानगर पोलिसांनी अकस्मात मृत्यूची नोंद केली. त्याच्या आत्महत्येचे कारण स्पष्ट झाले नाही. मात्र, घरगुती वादातून त्याने हा आत्मघाती निर्णय घेतल्याचा पोलिसांनी अंदाज काढला आहे.
त्याचप्रमाणे शांतीनगरातील लालगंजगुजरी हनुमान मंदिराजवळ राहणारे दामोदर कोठीराम कामठे (वय ६०) यांनी गळफास लावून घेतला. गुरुवारी सकाळी नऊच्या सुमारास ही घटना उघडकीस आली. काैशल्याबाई दामोदर कामटे (वय ५०) यांनी दिलेल्या तक्रारीवरून शांतीनगर पोलिसांनी अकस्मात मृत्यूची नोंद केली. पुढील तपास सुरू आहे.
---