नागपूर : अखिल भारतीय नाट्य परिषदेत गेल्या दोन महिन्यापासून सुरू असलेल्या गोंधळात आज मुंबई येथे पार पडलेल्या नियामक मंडळाच्या विशेष सभेत नाट्य परिषदेचे प्रभारी अध्यक्ष म्हणून नरेश गडेकर यांची निवड करण्यात आली आहे.
या सभेविरुद्ध पदच्युत अध्यक्षांनी कोर्टात धाव घेतली होती. १६ फेब्रुवारीला दोन्ही गटाचा युक्तिवाद ऐकल्यानंतर कोर्टाने १७ फेब्रुवारीपर्यंत निर्णय राखून ठेवला होता. १७ तारखेला कोर्टाने नियामक मंडळाची बाजू सरस ठरवली होती. त्यानंतर गुरुवारी नियामक मंडळाची नियोजित विशेष सभा पार पडली. नाट्य परिषदेचे उपक्रम उपाध्यक्ष नरेश गडेकर यांच्या अध्यक्षतेखाली ही सभा पार पडली. सभेत एकूण ३९ सदस्य उपस्थित होते. यावेळी ३८ सदस्यांनी विद्यमान अध्यक्षांच्या विरोधात मतदान केले आणि दोन सदस्यांनी तटस्थ राहण्याची भूमिका घेतली. अशा तऱ्हेने विद्यमान अध्यक्षांना पदच्युत करण्यात नियामक मंडळाला यश आले. पुढील अध्यक्ष निवडेपर्यंत नरेश गडेकर यांना हंगामी अध्यक्ष म्हणून पदभार सोपविण्यात आला आहे. या सगळ्या गोंधळात नियामक मंडळ सदस्य गडेकर यांनाच नियोजित अध्यक्ष म्हणून निवडण्याची तयारी करत असल्याचे एकूणच घडामोडीवरून स्पष्ट होत आहे. सध्या हंगामी असले तरी विदर्भाला प्रथमच अध्यक्षपदाचा मान मिळाला आहे आणि हा मान पुढचे अडीच वर्षे कायम राहण्याची शक्यता आहे.