नागपूर नागरिक सहकारी बँकेच्या

नागपूर : १ जानेवारीपासून राष्ट्रीय महामार्गावरील सर्व टोल नाक्यांवरून आवागमन करताना केवळ फास्टॅग कार्डाद्वारेच ऑनलाईन भुगतान अनिवार्य करण्याच्या केंद्र शासनाच्या नव्या दिशानिर्देशानुसार नागपूर नागरिक सहकारी बँकेच्या सर्व शाखांमध्ये फास्टॅग कार्ड सुविधा उपलब्ध करून दिली आहे. अत्यंत माफक दरात वैयक्तिक आणि व्यावसायिक श्रेणीच्या चारचाकी वाहनांसाठी फास्टॅग सुविधा उपलब्ध करणारी नागपूर नागरिक सहकारी बँक विदर्भातील पहिली सहकारी बँक ठरली आहे. त्यासाठी बँकेच्या नॅशनल पेमेंट कॉर्पोरेशन ऑफ इंडिया या फास्टॅग विषय केंद्रीय संस्थेकडून परवाना प्राप्त झाला असून या सुविधेच्या योग्य कार्यान्वहनासाठी बँकेने वन-पे सोल्युशन प्रा.लि. यांच्यासोबत सामंजस्य करारही केला आहे. फास्टॅग कार्ड प्राप्त करण्यासाठी चारचाकी वाहनधारकांना बँकेच्या कुठल्याही शाखेत आपले बचत, चालू वा कर्जखात्याच्या माध्यमातून कार्ड प्राप्त करून घेता येईल. बँक खात्यासोबतच त्यांच्या वाहनाचे नोंदणी प्रमाणपत्र, वाहनाचा इंजिन आणि चेसिस क्रमांक आदी विवरण देऊन संबंधित वाहन बँक खात्याशी लिंक करताच ग्राहकांना फास्टॅगद्वारे ऑनलाईन टोल भुगतानाचा लाभ घेता येईल. याशिवाय बॅकेने गृह आणि वैयक्तिक उपयोगाच्या वाहन कर्जावरील व्याजदरात लक्षणीय कपात केली असून ८ टक्के व्याजदरात गृहकर्ज आणि ८.९५ टक्के व्याजदरात वाहनकर्ज उपलब्ध केले आहे. सर्व कर्ज प्रकारावरील व्याज आकारणी ही डेली रिड्युसिंग बॅलन्सवर आधारित असल्याने ग्राहकांना त्यांच्या मासिक कर्ज हप्त्यातही सूट मिळत आहे. नव्या सुविधांचा लाभ घ्यावा, असे बँकेचे अध्यक्ष प्रा. संजय भेंडे आणि मुख्य कार्यकारी अधिकारी सुभाष गोडबोले यांनी म्हटले आहे. (वा.प्र.)