घसरगुंडी :पावणेपाच लाखावरून आले तीनवर
नागपूर : खासदार म्हणून नागपूरचे तब्बल चार वेळा संसदेत प्रतिनिधित्त्व करणारे काँग्रेसचे खा. विलास मुत्तेमवार यांचा मतांचा आलेख प्रत्येक निवडणुकीत घसरतच गेला आहे. १९९८ मध्ये पाऊणे पाच लाख मते घेत एकतर्फी विजय नोंदविणार्या मुत्तेमवार यांना २०१४ च्या निवडणुकीत मात्र फक्त ३ लाख मतांवर समाधान मानत जळपास तेवढ्याच मतांनी पराभव स्वीकारावा लागला आहे. काँग्रेसची कमी होत गेलेली लोकप्रियता व भाजपने संघटनात्मक बांधणीवर दिलेला भर यामुळे प्रत्येक निवडणुकीत मुत्तेमवारांची क्रेझ कमी होत गेली आहे. ही मुत्तेमवारांची एकूण नववी व नागपुरातून पाचवी निवडणूक होती. गेल्या चारही निवडणुकांमध्ये मुत्तेमवार यांनी नागपुरात बाजी मारली असली तरी प्रत्येक निवडणुकीत त्यांची मते ४ ते ५ टक्क्क््यांनी कमी होत आली आहेत. १९९८ मध्ये त्यांनी मुत्तेमवार यांनी ४ लाख ८६ हजार ९२६ (५७.४१ टक्के) मते घेत भाजपचे रमेश मंत्री यांना मात दिली. त्यानंतर वर्षभराने १९९९ मध्ये झालेल्या निवडणुकीत त्यांनी माजी मंत्री विनोद गुडधे पाटील यांनाही नमविले. मुत्तेमवार यांना ४ लाख २४ हजार ४५० मते (५२.३८ टक्के ) मिळाली. २००४ मध्ये माजी महापौर अटलबहादूर सिंग यांना भाजपने रिंगणात उतरविले. मुत्तेमवार त्यांनाही पुरुन उरले. ३ लाख ७३ हजार २६४ (४७ टक्के) मते घेतली. २००९ च्या निवडणुकीत मात्र, त्यांना भाजपचे बनवारीलाल पुरोहीत यांनी तगडे आव्हान दिले. या निवडणुकीत भाजपची मते वाढली व मुत्तेमवारांच्या मतांमध्ये मोठी घट झाली. या वेळी त्यांना ३ लाख १५ हजार १४८ मते ( ४१.७२ टक्के) मिळाली. नागपुरातून विजयाचा ‘चौकार’ मारणार्या मुत्तेमवारांना या वेळी मात्र भाजपचे राष्ट्रीय नेते नितीन गडकरी यांनी ‘क्लिन बोल्ड’ केले. मुत्तेमवार यांना फक्त ३ लाख २ हजार ९३९ म्हणजे २७.९० टक्के मते मिळाली. म्हणजेच मुत्तेमवारांची तब्बल साडेतेरा टक्के मते घटली.