लोकमत न्यूज नेटवर्क
नागपूर : रेमडेसिविरचा काळाबाजार करणाऱ्यांमध्ये एक मोठे रॅकेटच सक्रिय असल्याचा संशय असून त्यात आणखी काही डॉक्टर आणि विविध हॉस्पिटलमधील कर्मचाऱ्यांचा सहभाग असल्याचा दाट संशय आहे. या पार्श्वभूमीवर, पोलिसांनी शुक्रवारी आणखी एका डॉक्टरसह वेगवेगळ्या हॉस्पिटलच्या कर्मचाऱ्यांची कसून चाैकशी केली. दुसरीकडे काळाबाजार करताना रंगेहाथ पकडण्यात आलेल्या चारही आरोपींना न्यायालयात हजर करून पोलिसांनी त्यांचा पाच दिवसांचा पीसीआर मिळवला.
नागपूरच नव्हे तर राज्यात कोरोनाचा अक्षरश: उद्रेक झाला आहे. त्यांना उपचार मिळणे कठीण झाले आहे. त्यात प्रेताच्या टाळूवरचे लोणी खाण्याची मानसिकता बाळगणाऱ्या काही उलट्या काळजाच्या मंडळींनी रेमडेसिविरचे ब्लॅकमार्केटिंग चालवले आहे. कोरोनाबाधितांना रुग्णालयात लावण्यासाठी आणलेल्या इंजेक्शनची १५ ते २५ हजारांत विक्री करण्याचा प्रचंड संतापजनक प्रकार या भामट्यांनी सुरू केला आहे. हे इंजेक्शन विकत घेण्यासाठी कोरोनाबाधित रुग्णांचे नातेवाईक जीवाचा आटापिटा करीत आहेत. गेल्या पाच दिवसांपासून नागपुरात सुरू असलेल्या या प्रकाराची पोलीस आयुक्त अमितेशकुमार यांनी गंभीर दखल घेऊन रेमडेसिविरचे ब्लॅकमार्केटिंग करणाऱ्यांच्या मुसक्या आवळण्याचे आदेश शहर पोलीस दलातील अधिकारी, कर्मचाऱ्यांना दिले होते. या पार्श्वभूमीवर परिमंडळ पाचचे पोलीस उपायुक्त नीलोत्पल यांनी सापळा रचला. त्यांनी डमी ग्राहक बनवून आरोपींशी संपर्क साधला आणि गुरुवारी सायंकाळी बनावट ग्राहकाच्या माध्यमातून रेमडेसिविर विकणारा डॉ. लोकेश शाहू आशा (आशा हॉस्पिटल, कामठी), वाॅर्डबॉय शुभम मोहदुरे आणि कुणाल कोहळे (स्वस्थम हॉस्पिटल, वर्धा रोड) आणि सुमीत बागडे (दत्ता मेघे हॉस्पिटल, वानाडोंगरी) या चाैघांना रंगेहाथ पकडले. त्यांच्याकडून १५ इंजेक्शन जप्त केले. त्यांना शुक्रवारी न्यायालयात हजर करून त्यांचा पाच दिवसांचा पीसीआर मिळवला. दरम्यान, प्रकरणाचे गांभीर्य लक्षात घेत उपायुक्त नीलोत्पल यांनी स्वत:च चाैकशीची सूत्रे हातात घेतली आहे. अटकेतील आरोपींकडून शुक्रवारी मोठी रक्कम जप्त केली. त्याबाबतचा खुलासा तूर्त करणे योग्य नसल्याचे उपायुक्त नीलोत्पल म्हणाले. आरोपींनी दिलेल्या माहितीवरून पोलिसांनी एका डॉक्टरसह कामठी आणि नागपुरातील आणखी चार हॉस्पिटलमधील कर्मचाऱ्यांची चाैकशी केली. रेमडेसिविरच्या काळ्याबाजारात या हॉस्पिटलचीही भूमिका काय आहे, त्याचीही आम्ही चौकशी करीत असल्याचे त्यांनी सांगितले. काळाबाजार करणाऱ्या या रॅकेटचे धागेदोरे बाहेर जिल्ह्याशीही जुळले असल्याचा संशय असल्यामुळे पुढच्या काही तासांत धक्कादायक घडामोडींचे संकेत पोलिसांकडून मिळाले आहेत.
---
ते इंजेक्शन मृत रुग्णांचे?
हॉस्पिटलमध्ये ज्या रुग्णांचा मृत्यू व्हायचा, त्याच्या जवळचे इंजेक्शन लंपास करून आम्ही ते विकत होतो, अशी माहिती आरोपींनी पोलिसांना दिली आहे. या माहितीची पोलिसांकडून शहानिशा केली जात आहे.
---