नागपुरात सडक्या सुपारीच्या काळ्या बाजारावर आयकर विभागाचा सर्जिकल स्ट्राईक

राजू अण्णा, कलीवाला बंधूंसह बड्या व्यापाऱ्यांवर छापे : १०० हून अधिक अधिकाऱ्यांच्या ताफ्यासह धाडसत्र सुरूच

नागपूर : नागपुरात महानगरपालिका निवडणुकीची धामधूम सुरू असतानाच, शनिवारी पहाटे आयकर विभागाने नागपुरातील बड्या सुपारी व्यापाऱ्यांच्या साम्राज्याला मोठा दणका दिला. सडक्या सुपारीच्या अवैध व्यवसायासाठी कुप्रसिद्ध असलेल्या इतवारी आणि मस्कासाथ भागातील व्यापाऱ्यांवर आणि त्यांच्याशी संबंधित ट्रान्सपोर्टर्सवर आयकर विभागाने एकाच वेळी छापे टाकल्याने संपूर्ण शहरात खळबळ माजली आहे. कर चुकवेगिरी करून कोट्यवधी रुपयांचा महसूल बुडविणाऱ्या या व्यापाऱ्यांचे धाबे दणाणले आहे. तपासणीदरम्यान अधिकाऱ्यांनी कोट्यवधीं रुपयांच्या व्यवहाराची कागदपत्रे आणि रोख रक्कम जप्त केल्याची माहिती आहे.

करचुकवेगिरी करणारे अनेक व्यापारी रडारवर

आयकर विभागाच्या मुंबई आणि नागपूर पथकातील १०० हून अधिक अधिकारी आणि कर्मचाऱ्यांनी पहाटे शांतीनगर येथील राजूू अण्णा (राजेश शिनॉय) आणि कामठी रोडवरील निवासस्थान, अल्ताफ, आसिफ आणि गनी कलीवाला यांची कार्यालये आणि गोदामांची झाडाझडती सुरू केली. तसेच सुपारी वाहतुकीशी संबंधित काही ट्रान्सपोर्ट व्यावसायिकही विभागाच्या कचाट्यात आले आहेत.

मुंबई कनेक्शन आणि कारवाई

मुंबईतील कुप्रसिद्ध सुपारी व्यापारी फारूखभाई यांच्याशी असलेल्या आर्थिक संबंधांच्या संशयावरून ही कारवाई करण्यात आली आहे. शनिवारी पहाटे कडेकोट बंदोबस्तात हे पथक नागपुरात दाखल झाले. पथकाने कळमना, भंडारा रोडवरील मां उमिया इंडस्ट्रियल एरियातील गोदामे, तसेच इतवारी, मस्कासाथ, जागनाथ बुधवारी येथील व्यापाऱ्यांची दुकाने आणि गोदामांची कसून तपासणी केली.

पथकाच्या सुरक्षेसाठी ह्यएके-४७ह्ण ने सुरक्षा रक्षक सज्ज

कारवाईचे गांभीर्य लक्षात घेता, एके-४७ ने सज्ज असलेले सुरक्षा रक्षक आणि डॉग स्कॉडचा ताफा सोबत असल्याने परिसरात दहशतीचे वातावरण पाहायला मिळाले.

मोठी बेहिशेबी मालमत्ता उघड होण्याची शक्यता

शनिवारी रात्रीपर्यंत कारवाई सुरू होतील. ही कारवाई आणखी दोन दिवस सुरू राहण्याची शक्यता आहे. जप्त केलेल्या कागदपत्रांची आणि रोख रकमेची मोजणी सुरू आहे. सडक्या सुपारीच्या व्यवहारातून कमावलेला काळा पैसा आणि टॅक्स चोरी या मुद्दांवर आयकर विभागाचे विशेष लक्ष आहे. सध्यातरी आयकर विभागाचे अधिकारी अधिकृत माहिती देण्यास तयार नाही, तरी या धाडसत्रातून मोठे मासे गळाला लागण्याची शक्यता वर्तवण्यात येत आहे.