लोकमत न्यूज नेटवर्क
नागपूर - पोटावर लाथा मारून गर्भपात केल्याच्या, तसेच अनैसर्गिक शरीरसंबंध प्रस्थापित केल्याच्या आरोपावरून अजनी पोलिसांनी बुटीबोरी पोलीस ठाण्यातील एका पोलीस शिपायावर गुन्हा दाखल केला. निखिल मधुकर शेगावकर (वय ६०) असे आरोपी पोलिसाचे नाव असून त्याच्यावर आरोप लावणारी त्याची पत्नी आहे.
मिनू (वय २९, नाव काल्पनिक) हिचे आरोपी निखिलसोबत जानेवारी २०१९ मध्ये लग्न झाले होते. लग्नात मनासारखे आंदण आणि हुंडा मिळाला नसल्यामुळे आरोपी पत्नी निखिल तसेच त्याचे नातेवाईक मिनूचा छळ करायचे. तिला टोमणे मारून मारहाणही करायचे. हा छळ करतानाच आरोपी निखिल मिनूला अश्लील चित्रफीत दाखवून तिच्याशी अनैसर्गिक शरीरसंबंध जोडायचा. वेदना होत असल्याचे सांगून तिने विरोध केल्यास तो तिला मारहाण करायचा. सासूला हा प्रकार सांगितला, तर ती निखिलला समजावण्याऐवजी सुनेलाच खोटे ठरवायची. दरम्यान तिला गर्भधारणा झाली. तशातही आरोपी निखिलने तिच्या पोटावर लाथा मारून तिचा गर्भ पाडला. विशेष म्हणजे, यानंतरही तिचा छळ सुरूच होता. त्यात सासू, दोन नणंदा आणि नणंदांच्या नवऱ्यांसह सात आरोपींचा सहभाग होता. माहेरच्या मंडळींचाही आरोपी अपमान करीत होते. नणंदेचा नवरा अशांत सोरते याने एकदा तिचा पदर ओढून छातीला हात लावण्याचा प्रयत्न केला आणि तिने ही बाब पती आणि सासूला सांगण्याचा इशारा दिला असता, आरोपी सोरतेने, तुलाच खोटे ठरवून बदनाम करेन, अशी धमकी दिली. तू मला शरीरसुखाची मागणी करतेस, असे तुझ्या नवऱ्याला आणि सासूला सांगेन, नंतर तुझे हाल होतील, अशीही धमकी आरोपींनी दिली. पती, सासू आणि अन्य आरोपींकडून होणारा त्रास कमी होण्याऐवजी वाढतच चालल्याने अखेर मिनूने अजनी पोलिसांकडे तक्रार दाखल केली. पोलिसांनी आरोपी निखिलविरुद्ध अनैसर्गिक कृत्य (अत्याचार) करून गर्भ पाडण्याच्या आरोपाखाली, नंदोई अशांत सोरतेविरुद्ध विनयभंग केल्याच्या तसेच सासू आणि अन्य आरोपींविरुद्ध हुंडयासाठी छळ केल्याच्या आरोपाखाली गु्न्हा दाखल केला.
----
शिपाई निखिलवर यापूर्वीही आरोप
आरोपी पोलीस शिपाई निखिलविरुद्ध यापूर्वीही असेच अनेक आरोप झाले आहेत. एका महिला शिपायानेही लैंगिक शोषण आणि चार लाख रुपये हडपल्याचा आरोप लावला होता. या संबंधाने जरीपटका ठाण्यात विनयभंगाचा गुन्हाही दाखल झाला होता. आरोपीने धाकदपटशा करून अनेकींचे तोंड बंद केल्याची तक्रार आहे.
---