भाषेचे वैविध्य हाच भारताचा दागिना

मी अनेक भाषातील कलाकृतीत काम केले आहे. वेगवेगळ्या भाषांतील सिनेमात काम केल्यामुळे मलाही वेगवेगळ्या परंपरा, प्रदेश, त्या भाषेचा कस आणि राहणीमान समजून घेता आले. प्रारंभीच्या काळात मी मराठीशिवाय

सोनाली कुळकर्णी : मनमोकळा संवाद
नागपूर : मी अनेक भाषातील कलाकृतीत काम केले आहे. वेगवेगळ्या भाषांतील सिनेमात काम केल्यामुळे मलाही वेगवेगळ्या परंपरा, प्रदेश, त्या भाषेचा कस आणि राहणीमान समजून घेता आले. प्रारंभीच्या काळात मी मराठीशिवाय इतर भाषेत काम करायला लागले तेव्हा माझ्या अनेक सहकलावंतांनी मला मूर्खात काढले. पण त्याला मी बधले नाही.
काम सुरू राहिले आणि आज मला त्याचे समाधान वाटते. वेगवेगळ्या भाषेत काम केल्याने त्या भाषांतील अनेक विषयांना मला भिडता आले, समजून घेता आले. भाषेचे वैविध्य हाच तर भारताचा दागिना आहे. आपण कुठलीही भाषा नाकारली तर आपण आपल्याच भाषेला नाकारत असतो, असे मत सुप्रसिद्ध अभिनेत्री सोनाली कुळकर्णीने व्यक्त केले.
‘व्हाईट लिली आणि नाईट रायडर’ या नाटकाच्या प्रयोगासाठी ती नागपुरात आली असताना तिने पत्रकारांशी संवाद साधला. मुळात हे नाटक रसिका जोशी, मिलिंद पाठक यांचे आहे. रसिका जोशी असतानाही मी या नाटकाच्या प्रेमात होते. माझ्या काही मित्रमैत्रिणींनाही हे नाटक पाहण्याचा आग्रह मी धरला. रसिकाने यातील भूमिका जिंवत केली होती. रसिका आता नाही. त्यानंतर मिलिंदने या भूमिकेसाठी मला फोन केला आणि मी तत्काळ होकार कळविला. होकार कळवायला मी बराच वेळ घेते पण या नाटकासाठी मात्र मी तयार झाले. कारण नाटक मला माहीत होते. यात रसिकाने स्वत:ची मुद्रा अंकित केली होती. मला तिच्यासारखे जमणे शक्य नव्हते. हे नाटक रसिकाच्या आठवणींतील असले तरी मला स्वतंत्रपणे या नाटकाकडे पाहावेसे वाटले आणि तेथूनच हे नाटक माझ्यासाठी आव्हान ठरले. रसिकाचा प्रभाव बाजूला ठेवून मी ही भूमिका करते आहे. आता यात मी स्वत:लाच शोधते आहे, असे ती म्हणाली. फेसबुक, सोशल साईट्स यामुळे होणारा गोंधळ, नातेसंबंध याच बाबीवर हे नाटक आधारलेले असल्याने याचा प्रेक्षकवर्ग सर्वच वयोगटाचा आहे. ‘चैत्र’ या लघुपटाचे प्रदर्शनही १४ तारखेला पर्सिस्टंट कंपनीच्या कालिदास सभागृहात सायंकाळी ६ वाजता तिच्या उपस्थितीत आयोजित करण्यात आले आहे. यात सोनालीने भूमिका केली आहे.
याप्रसंगी या लघुपटाबाबतही तिने माहिती दिली. हा लघुपट जी. ए. कुळकर्णी यांच्या कथेवर आधारलेला आहे. यावेळी कीर्ती रायकर, समीर नाफडे, विष्णू मनोहर उपस्थित होते. (प्रतिनिधी)