नागपूर : कोरोनाबाधितांमध्ये वाढ होताच याचा परिणाम लसीकरणावरही झाला. ५० टक्क्यांवर असलेले लसीकरण सध्या ८६ टक्क्यांवर गेले आहे. गुरुवारी ३५०० पैकी ३०१८ म्हणजे ८६ टक्के लाभार्थ्यांनी लस घेतली. विशेष म्हणजे, १५ फेब्रुवारीपासून सुरू झालेल्या दुसऱ्या डोसच्या लसीकरणालाही चांगला प्रतिसाद मिळत आहे.
नागपूर शहरात १९ केंद्रांवर प्रत्येकी १०० प्रमाणे १९०० लसीकरणाचे लक्ष्य देण्यात आले होते. त्यापैकी फ्रंट लाइन वर्कर व हेल्थ वर्कर मिळून २०२० लाभार्थ्यांना लस देण्यात आली. विशेष म्हणजे, दुसऱ्या डोसचे २७४ लसीकरणाचे लक्ष्य होते. याचे १०० टक्के लसीकरण झाले. यावरून लसीकरणाविषयी गंभीरता वाढत असल्याचे चित्र आहे.
- ग्रामीणमध्ये ५६ टक्के लसीकरण
नागपूर ग्रामीणला २२२० लसीकरणाचे लक्ष्य देण्यात आले होते. त्यापैकी १२४७ लसीकरण झाले. एकूण ५६ टक्के लाभार्थ्यांना लस देण्यात आली. ९०२१ पैकी आतापर्यंत ९०० लाभार्थ्यांनी कोरोना प्रतिबंधक लसीकरणाचा दुसरा डोस घेतला आहे.