नागपूर : अल्पवयीन मुलीचे अपहरण केल्यानंतर गुन्हेगार साथीदारांच्या मदतीने घरफोडी करणारा आरोपी पंकज उरकुडेला उपचारासाठी मेडिकलमध्ये दाखल केले असता तो पोलिसांच्या तावडीतून फरार झाला. मंगळवारी रात्री मेडिकलमध्ये घडलेल्या या घटनेमुळे पोलिसात खळबळ उडाली आहे.
पंकजला सोनेगाव पोलिसांनी चोरीच्या दोन प्रकरणात अटक केली होती. त्याने खामलाच्या कुख्यात प्रणव ठाकरेच्या सांगण्यावरून ही घटना घडवून आणली होती. पंकज अल्पवयीन मुलीचे अपहरण करून फरार झाला होता. अपहरणाचा गुन्हा दाखल झाल्यानंतर तो फरार होता. दरम्यान प्रणवशी त्याची ओळख झाली. प्रणवने त्याला अमरावतीच्या मोर्शी येथे लपविले. ८ जानेवारीला सोनेगाव पोलिसांनी मोर्शीवरून त्यास अटक करून १.४५ लाखाचा मुद्देमाल जप्त केला.
पंकज १२ जानेवारीपर्यंत सोनेगाव पोलिसांच्या ताब्यात होता. मंगळवारी सायंकाळी त्याला उलटी होत होती. पंकजने तब्येत बरी नसल्याचे पोलिसांना सांगितले. पोलिसांनी त्याला मेडिकलमध्ये दाखल केले. रात्री १०.४५ वाजता दोन हवालदार अणि एका शिपायाने त्याला मेडिकलमध्ये आणले. तेथे तपासणीनंतर डॉक्टरांनी त्यास सलाईन लावले. उपचारानंतर त्याला डॉक्टरांनी नेण्यास सांगितले.
रात्री १.४५ वाजता पोलीस त्याला वाहनात बसवून नेत असताना त्याने पोलिसांना झटका देऊन पळ काढला. पोलिसांनी त्याचा पाठलाग केला. परंतु रात्रीची वेळ असल्यामुळे पंकज फरार झाला. पोलिसांनी वरिष्ठ अधिकाऱ्यांना सूचना दिली. पोलिसांनी पंकजच्या घरी तसेच इतर ठिकाणी शोध घेतला. त्याचा शोध न लागल्यामुळे पोलिसांनी फरार झाल्याचा गुन्हा दाखल केला. उपचारादरम्यान पंकजने हाताला बांधलेल्या दोरीची पकड ढिली केली होती.