अमित शाह आले तेव्हाच धक्का दिला असता, पण...; राऊत-राणेंमध्ये जुंपली

अमित शाह सिंधुदुर्गात आले त्याच वेळी आम्ही भाजपला झटका देऊ शकत होतो. पण, राणेंची थोडी तरी राखावी, म्हणून आम्ही या सात नगरसेवकांचा पक्षप्रवेश दोन दिवस पुढे ढकलला.

सिंधुदुर्ग - केंद्रीय गृहमंत्री अमित शाह राज्यसभा खासदार नारायण राणे (Narayan Rane) यांच्या वैद्यकीय महाविद्यालयाच्या उद्घाटनासाठी येऊन गेल्यानंतर, जिल्ह्यात राणे आणि खासदार विनायक राऊत (Vinayak Raut) यांच्यात चांगलीच जुंपली आहे. राऊतांनी आता राणेंवर जबरदस्त पलटवार केला आहे. एवढेच नाही, तर त्यांनी निलेश राणे (Nilesh Rane) यांच्यावरही थेट निशाणा साधला आहे. (Vinayak Raut slams Narayan Rane and Nilesh Rane)

"अमित शाह सिंधुदुर्गात आले त्याच वेळी आम्ही भाजपला झटका देऊ शकत होतो. पण, राणेंची थोडी तरी राखावी, म्हणून आम्ही या सात नगरसेवकांचा पक्षप्रवेश दोन दिवस पुढे ढकलला," असे विनायक राऊत यांनी म्हटले आहे. ते एका स्थानिक वृत्त वाहिनीशी बोलत होते.  

मारामारी आणि शिवीगाळीची भाषा निलेश राणेंनाच शोभते -
मारामारी, शिवीगाळ आणि अरेरावीची भाषा निलेश राणेंनाच शोभते. ती भाषा इतरांना शोभत नाही. त्यांच्या बकवासगिरीला कोकणातील जनतेने एकदा नाही, तर दोन वेळा धडा शिकवला आहे. ते त्यांना पुन्हा एकदा धडा शिकवतील, असे राऊत यांनी म्हटले आहे. एवढेच नाही, तर नितेश राणेंना कंटाळून वैभववाडीचे नगरसेवक शिवसेनेत प्रवेश करत आहेत. यानंतर जिल्ह्यातील भाजपचे आणखी काही पदाधिकारी शिवसेनेत येतील, असेही राऊत म्हणाले.

अमित शहा सिंधुदूर्गमध्ये येऊन जात नाहीत तोच शिवसेनेचा भाजपला धक्का -  
अमित शहा सिंधुदूर्गमध्ये येऊन जात नाहीत तोच शिवसेनेने आमदार नितेश राणे यांच्या मतदारसंघातील वैभववाडी नगरपरिषदेचे 7 नगरसेवक फोडले आहेत. हे नगरसेवक लवकरच शिवसेनेत प्रवेश करणार असून यावर नितेश राणे यांनी उद्धव ठाकरे हार, गुच्छ घेणार नसल्याने हे नगरसेवक व्हॅलेंटाईन गिफ्ट असल्याचे म्हटले होते. आता नारायण राणेंना केंद्रात मंत्रिपद मिळण्यावरून चर्चा जोर धरू लागली आहे. यावर शिवसेनेने टीका केली आहे. 

नारायण राणे नॉन मॅट्रिक माणूस -  राऊत
नारायण राणेंसारख्या नॉन मॅट्रिक माणसाला केंद्रात मंत्रिपद देण्याची वेळ आली, तर दुर्दैवच, असा टोला राऊत यांनी भाजपला हाणला आहे. कॉलेजच्या उद्घाटनासाठी मंजुरीच्या फाईलवर सही करण्यासाठी मातोश्रीवर फोन केल्याचे राणे यांनी सांगितले होते. त्या आधी राऊत यांनीदेखील राणे सारखे सारखे मातोश्रीवर फोन करत असल्याचे म्हटले होते. त्याला राणे यांनी महिनाभराने कबुलीही दिली होती. 

काय म्हणाले होते निलेश राणे - 
वाभदे-वैभववाडी नगरपंचायतमध्ये भाजपची एक हाती सत्ता होती. 17 पैकी 17 नगरसेवक हे भाजपकडे होते. मात्र सोमवारी त्यातील 7 नगरसेवक फुटून आज शिवसेनेत प्रवेश करत असल्याने भाजपला मोठा धक्का बसल्याचे सांगण्यात येत आहे. मात्र याचदरम्यान भाजपाने शिवसेनेलादेखील आता इशारा दिला आहे. आमचे जेवढे नगरसेवक फोडले, त्याच्या पाच पटीने तुमचे फोडणार, असा इशारा भाजपाचे खासदार नारायण राणे यांचे पुत्र आणि माजी खासदार निलेश राणे यांनी दिला आहे.  मुख्यमंत्री उद्धव ठाकरे यांच्या उपस्थितीत हा पक्ष प्रवेश होणार आहे. या 7 जणांसह माजी नगराध्यक्ष, उपनगराध्यक्ष यांचाही समावेश आहे. भाजपाचे आमदार नितेश राणे सोमवारपर्यंत त्यांच्या परिवारावर दबाव टाकत होते, असा आरोप या नगरसेवकांनी केला आहे.