'हा विजय म्हणजे अजितदादांच्या कार्याला जनतेने वाहिलेली आदरांजली'; जिल्हा परिषद निकालांनंतर सुनील तटकरे भावूक

जिल्हा परिषद आणि पंचायत समितीच्या सार्वत्रिक निवडणुकांचे निकाल आज जाहीर झाले असून, यामध्ये राष्ट्रवादी काँग्रेसने जोरदार मुसंडी मारली आहे.

राज्यात नुकत्याच पार पडलेल्या जिल्हा परिषद आणि पंचायत समितीच्या सार्वत्रिक निवडणुकांचे निकाल आज जाहीर झाले असून, यामध्ये राष्ट्रवादी काँग्रेसने जोरदार मुसंडी मारली आहे. या घवघवीत यशानंतर राष्ट्रवादी काँग्रेसचे (अजित पवार गट) प्रदेशाध्यक्ष खासदार सुनील तटकरे यांनी आपली पहिली प्रतिक्रिया व्यक्त केली आहे. "हा विजय म्हणजे राज्याचे दिवंगत उपमुख्यमंत्री आणि आमचे नेते अजितदादा पवार यांच्या कार्याला आणि त्यांच्या अविरत परिश्रमांना जनतेने कृतज्ञतापूर्वक अर्पण केलेली आदरांजली आहे," अशा शब्दांत तटकरे यांनी आपल्या भावना व्यक्त केल्या.

अजितदादांच्या विचारांवर जनतेचे शिक्कामोर्तब

निवडणुकीच्या निकालांवर भाष्य करताना सुनील तटकरे म्हणाले की, अजितदादांनी आयुष्यभर तळागाळातील सामान्य माणसाच्या विकासासाठी स्वतःला वाहून घेतले होते. महाराष्ट्राच्या कानाकोपऱ्यात विकासाची गंगा पोहोचवण्यासाठी त्यांनी अहोरात्र परिश्रम घेतले. आजचा हा निकाल म्हणजे केवळ विजय नसून, दादांच्या विचारांवर आणि त्यांच्या खंबीर नेतृत्वावर जनतेने ठेवलेल्या अढळ श्रद्धेची ही मोठी साक्ष आहे.

'दादांचा वारसा अधिक जबाबदारीने पुढे नेणार'

सुनील तटकरे यांनी सोशल मीडिया प्लॅटफॉर्म 'एक्स'वर पोस्ट करत कार्यकर्त्यांचे आभार मानले. त्यांनी म्हटले की, "या विजयामुळे आमची जबाबदारी अधिक वाढली आहे. अजितदादांनी जो विकासाचा वारसा आमच्याकडे सोपवला आहे, तो जपत अधिक प्रामाणिकपणे जनतेची सेवा करण्याचा आमचा संकल्प आता अधिक दृढ झाला आहे."

राष्ट्रवादीचा कार्यकर्त्यांमध्ये उत्साह

अजितदादांच्या निधनानंतर झालेली ही पहिली मोठी स्थानिक स्वराज्य संस्थांची निवडणूक असल्याने सर्वांचे लक्ष या निकालांकडे लागले होते. जिल्हा परिषद आणि पंचायत समित्यांमध्ये मिळालेल्या या यशानंतर राष्ट्रवादी काँग्रेसच्या कार्यकर्त्यांमध्ये मोठा उत्साह पाहायला मिळत असून, ठिकठिकाणी विजयाचा जल्लोष साजरा केला जात आहे.