Raigad Boat Capsizes: रायगडमध्ये सावित्री नदीत बोट उलटली; काळजाचा ठोका चुकवणारा व्हिडीओ समोर!
By ऑनलाइन लोकमत | Updated: June 24, 2025 14:31 IST2025-06-24T14:29:56+5:302025-06-24T14:31:07+5:30
Raigad Savitri River Boat Capsizes: रायगड जिल्ह्यातील पोलादपूरजवळ सावित्री नदीत बचाव पथकाची बोट पाण्यात उलटली.
Raigad Boat Capsizes: रायगडमध्ये सावित्री नदीत बोट उलटली; काळजाचा ठोका चुकवणारा व्हिडीओ समोर!
रायगड जिल्ह्यातील पोलादपूरजवळ सावित्री नदीत सोमवारी (२३ जून) संध्याकाळी प्रवाहात बुडालेल्या एका तरुणाचा शोध घेत असताना बचाव पथकाची बोट उलटली. सुदैवाने, या घटनेत कोणताही जीवितहानी किंवा कोणतीही दुखापत झाली नाही. बोट नदीत उलटल्यानंतर बचाव पथकातील जवानांनी पोहत किनारा गाठून स्वत:चा जीव वाचवला. एआयएनएस वृत्त संस्थेने त्यांच्या अधिकृत एक्स हँडलवरून या घटनेचा व्हिडीओ शेअर केला आहे.
Maharashtra: A rescue team in Poladpur, Raigad, had a narrow escape yesterday when their boat overturned in the strong currents of the Savitri River while searching for a youth who had drowned. Fortunately, all team members survived by jumping into the water. The incident was… pic.twitter.com/D5fiFnMKNI
— IANS (@ians_india) June 24, 2025
मिळालेल्या माहितीनुसार, सोमवारी संध्याकाळी सावित्री नदीत पोहणाऱ्या तीन तरुणांपैकी एक तरुण अचानक पाण्याच्या प्रवाहात ओढला गेला आणि तो बेपत्ता झाला. नरवीर, काळभैरवनाथ व साळुंखे रेस्क्यू टीम यांच्यासह आपदा मित्र यांनी बेपत्ता तरुणाचा सायंकाळपर्यंत शोध घेतला. मात्र, तो सापडला नाही. या तरुणाचा शोध घेण्यासाठी बचाब पथकातील जवान बोटीसह नदीत उतरले. परंतु, पाण्याचा प्रवाह जास्त असल्यामुळे बचाव पथकाची बोट उलटली. बोट उलटल्यानंतर जवानांनी ताबडतोब पाण्यात उड्या घेतल्या आणि पोहोत किनारा गाठला. सुदैवाने, या घटनेत कोणतीही जीवितहानी झाली नाही.
जोगेश सुरेन ओरन (वय, २१) असे बेपत्ता झालेल्या तरुणाचे नाव आहे. जोगेश हा लॉर्सन अँड टुब्रो कंपनीतील कंत्राटी कामगार असल्याची माहिती आहे. जोगेश हा आपल्या दोन सहकाऱ्यांसह नदीत पोहोण्यासाठी गेला होता. परंतु, पाण्याचा प्रवाह जास्त असल्याने तो नदीत वाहून गेला, असे सांगण्यात आले.