परशुराम उपरकर यांना जामीन

शिवसेनेला जय महाराष्ट्र करून मनसेत प्रवेश केलेल्या माजी आमदार परशुराम उपरकर यांना उच्च न्यायालयाने मंगळवारी २५ हजार रूपयांचा जामीन मंजूर केला़

मुंबई : शिवसेनेला जय महाराष्ट्र करून मनसेत प्रवेश केलेल्या माजी आमदार परशुराम उपरकर यांना उच्च न्यायालयाने मंगळवारी २५ हजार रूपयांचा जामीन मंजूर केला़ गेले सहा दिवस ते कोठडीत होते़ मालवण येथील तहसिल कार्यालयावर ३ मार्च २००८ रोजी शिवसेनेने मोर्चा काढला होता़ त्यावेळी उपरकर व इतर कार्यकर्त्यांनी पोलीस कामात अडथळा आणला़ याप्रकरणी उपरकर यांच्यासह इतर काहीजणांवर गुन्हा नोंदवण्यात आला़ मालवण प्रथम वर्ग न्यायदंडाधिकारी यांनी उपरकर यांना एक वर्षाची शिक्षा ठोठावली़ त्याला उपरकर यांनी तेथील सत्र न्यायालयात आव्हान दिले़ २२ मे २०१४ रोजी सत्र न्यायालयाने उपरकर यांची एक वर्षांची शिक्षा एक महिन्यावर आणली़ त्याचवेळी उपरकर यांना पोलिसांनी ताब्यात घेतले़ त्यानंतर उपरकर यांनी सत्र न्यायालयाच्या या निकालाविरोधात अ‍ॅड़ राजेंद्र शिरोडकर व न्या़ अर्चित साखळकर यांच्यामार्फत उच्च न्यायालयात याचिका दाखल केली़ त्यावर सुट्टीकालीन न्या़ एम़ एस़ सोनक यांच्या समोर सुनावणी झाली़ उपरकर यांना याचा खटला सुरू असताना जामीन मंजूर झाला होता व सत्र न्यायालयाचा निकाल आल्यानंतर तात्काळ त्यांना ताब्यात घेण्यात आले़ प्रत्यक्षात त्यांच्या कोठडीची आवश्यकता नाही़ त्यामुळे त्यांना जामीन मंजूर करावा, अशी मागणी अ‍ॅड़ साखळकर यांनी केली़ ती मान्य करत न्यायालयाने उपरकर यांना जामीन मंजूर केला व सत्र न्यायालयाच्या निकालाविरोधातील त्यांची याचिकाही सुनावणीसाठी दाखल करून घेतली़