Bharatshet Gogawale:रायगडच्या पालकमंत्रीपदावरुन उपमुख्यमंत्री एकनाथ शिंदे यांच्यात शिवसेनेत आणि उपमुख्यमंत्री अजित पवार यांच्या राष्ट्रवादी काँग्रेसमध्ये जोरदार वादावादी सुरु असल्याचे पाहायला मिळत आहे. रायगडच्या पालकमंत्रीपदासाठी मंत्री आदिती तटकरे आणि मंत्री भरत गोगावले यांच्यात जोरदार रस्सीखेंच सुरु असल्याचे पाहायला मिळत आहे. अशातच भरत गोगावले यांचा आणखी एक व्हिडिओ सोशल मीडियावर व्हायरल झाला आहे. राष्ट्रवादी काँग्रेसचे प्रवक्ते सूरज चव्हाण यांनी हा व्हिडिओ ट्विट केला आहे. या व्हिडिओमध्ये भरत गोगावले मांत्रिकासोबत दिसत आहेत. या व्हिडिओद्वारे गोगावलेंवर अघोरी पूजेचा आरोप करण्यात आला.
महायुतीचा घटक पक्ष असलेल्या राष्ट्रवादी काँग्रेस पक्षाचे प्रवक्ते सूरज चव्हाण यांनी हा नवीन व्हिडिओ पोस्ट केला आहे. व्हिडिओमध्ये एक अघोरी बाबा मंत्रोच्चार करताना दिसत आहे, तर भरत गोगावले पूजेमध्ये सहभागी झालेले दिसत आहेत. बाबा भरतशेठ + आघोरी विद्या = पालकमंत्री ?? असं कॅप्शन सूरज चव्हाण यांनी या व्हिडीओला दिलं आहे. रायगडचे पालकमंत्रीपद मिळविण्यासाठी गोगावले यांनी अघोरी पूजा केल्याचा आरोप सूरज चव्हाण यांनी केलाय.
त्याआधी ठाकरे गटाच्या वसंत मोरे यांनी भरत गोगावले हे अघोरी पूजा करत असल्याचा व्हिडिओ पोस्ट केला होता. त्यानंतर आता सत्तेत सहभागी असलेल्या अजित पवार गटाकडूनही भारत गोगावले यांना लक्ष्य करण्यात आले. शिवसेनेचे आमदार भरत गोगावले यांनी विधानसभा निवडणुकीपूर्वी स्वतःच्या घरात होम हवन करत अघोरी पूजा घातली होती. यासाठी त्यांनी उज्जैन येथील बगलामुखी देवीच्या मंदिरातील पुजाऱ्यांना बोलावले होते. या पुजाऱ्यामार्फत त्यांनी घरात अघोरी पूजा घातली होती असा आरोप शिवसेना उद्धव बाळासाहेब ठाकरे पक्षाचे नेते वसंत मोरे यांनी केला.
मात्र भरत गोगावले यांनी अघोरी पूजेचे आरोप पूर्णपणे फेटाळून लावले आहेत.'मी कोणतीही अघोरी पूजा केलेली नाही. माझ्या घरी अनेक साधू आणि संत येतात, हा व्हिडिओ त्याचाच आहे. तो चुकीच्या पद्धतीने सादर केला जात आहे,' असं गोगावले यांनी म्हटलं होतं.