मुंबई सेंट्रल आगार हिट लिस्टवर

एसटीचे मुंबई सेंट्रल आगार हे दहशतवाद्यांच्या लिस्टवर असल्याचे उघड झाले आहे

सुशांत मोरे, मुंबई - एसटीचे मुंबई सेंट्रल आगार हे दहशतवाद्यांच्या लिस्टवर असल्याचे उघड झाले आहे. इंडियन मुजाहिद्दीनचा म्होरक्या आणि मास्टरमार्इंड दहशतवादी यासिन भटकळला अटक केल्यानंतर त्याच्या चौकशीतून अनेक महत्त्वाच्या गोष्टी बाहेर आल्या आहेत. यात महत्त्वाची गोष्ट म्हणजे यासिन भटकळने मुंबई सेंट्रल आगाराचीदेखील पाहणी केली होती. भटकळच्या चौकशीतून ही बाब उघड झाल्यानंतर पोलिसांकडून मुंबई सेंट्रल डेपोत येणार्‍या प्रवाशांच्या सुरक्षेसाठी एसटी महामंडळाला उपायोजना करण्याच्या सूचना करण्यात आल्या आहेत. मात्र सुस्त असलेल्या एसटी महामंडळाने सुरक्षेविषयी कुठलेही कठोर पाऊल उचलले नसल्याचेच दिसते. एसटी महामंडळाची २४७ आगार आणि ५७0 बस स्थानके आहेत. आगारांमध्ये मुंबईत परेल, कुर्ला नेहरू नगर आणि एसटीच्या मुख्यालयाला लागूनच मुंबई सेंट्रल आगार असून, गर्दीच्या काळात या तीनही आगारांमध्ये मोठ्या प्रमाणात गर्दी होत असते. तीनही आगारांमध्ये डोअर मेटल डिटेक्टर असले तरी बहुतांश वेळा ते बंदच असतात. तर या डोअर मेटल डिटेक्टरमधून एखादी संशयित व्यक्ती गेल्यास ते पाहण्यासाठीदेखील एसटीचे सुरक्षारक्षक नाहीत. त्याचप्रमाणे सीसीटीव्हींचीही बोंब आहे. फक्त उद्घोषणा करण्यापलीकडे एसटी महामंडळाकडून सुरक्षेच्या दृष्टीने कुठल्याही उपाययोजना केल्या जात नाहीत. त्यामुळे प्रवाशांच्या सुरक्षेची जबाबदारी कुणाची, असा प्रश्न आता पडत आहे. मागील वर्षाच्या आॅगस्ट महिन्यात दहशतवादी यासिन भटकळला अटक करण्यात आली. त्याच्या अटकेनंतर केलेल्या चौकशीत अनेक महत्त्वाच्या बाबी उघड होत आहेत. भटकळने मुंबईत अनेक महत्त्वाच्या ठिकाणांची रेकी (पाहणी) केली होती. यात मुंबई सेंट्रल आगाराचाही समावेश असल्याचे पोलिसांकडून सांगण्यात आले आहे. मुंबई पोलिसांना या डेपोच्या सुरक्षेबाबत एसटी महामंडळाशी सहकार्य करण्यास सांगतानाच सुरक्षेच्या सूचनाही महामंडळाला करण्यास सांगितले. त्यामुळे नागपाडा पोलीस स्टेशनने यासंदर्भात एसटी महामंडळाशी बैठक घेऊन सुरक्षेच्या उपाय करण्याच्या सूचना केल्या. मात्र या सूचना करूनही महामंडळाने प्रवाशांच्या सुरक्षेकडे दुर्लक्ष करत केवळ स्वत:च्या मुख्यालयासाठी डोअर मेटल डिटेक्टर आणि सीसीटीव्ही कॅमेरे बसवले. हे पाहता एसटी महामंडळ प्रवाशांच्या सुरक्षेबाबत किती सुस्त आहे, हेच दिसून येते.