औरंगाबाद: भारतीय जनता पक्ष आणि राष्ट्रवादी काँग्रेस पक्षाचे नेते एकमेकांवर नेहमी टीका करत असतात. यातच केंद्रीय संस्थांच्या कारवाईवरुन राज्यातील राजकारण तापलेलं असताना आता भाजपचे खासदार सुजय विखे पाटील(Sujay Vikhe Patil) आणि राज्याचे उपमुख्यमंत्री अजित पवार यांचे पुत्र पार्थ पवार(Parth Pawar) यांनी एकत्र विमान प्रवास केल्याचे काही फोटोज समोर आले आहेत.
अहमदनगरचे भाजप खासदार सुजय विखे पाटील आणि पार्थ पवार यांनी औरंगाबाद ते मुंबई एकाच विमानातून प्रवास केला. दोघांनीही जवळपास 40 मिनिटे एकत्र घालवले. या प्रवासाचे फोटो खासदार सुजय विखे पाटील यांनी आपल्या सोशल मीडिया अकाऊंट्सवर पोस्ट केले आहेत. हे फोटोज शेअर करताना त्यांनी कॅप्शनमध्ये लिहिलं, 'मैत्री सर्व सीमांच्या पलिकडची.'(Friendship Beyond Boundaries..!).
दोन्ही पक्षाच्या नेत्यांमध्ये नेहमी आरोप प्रत्यारोप सुरू असतात. पण, दोन्ही पक्षातील अनेक नेत्यांची चांगली मैत्री आहे. राजकीय नेत्यांच्या मैत्रीची महाराष्ट्रात अनेक उदाहरणे आहेत. त्यातच आता सुजय विखे पाटील आणि पार्थ पवार यांच्या रुपाने मैत्रीचे नवीन नाते राज्याला पाहायला मिळाले आहे. सुजय विखे पाटील यांनी पार्थ पवारांसोबतचे फोटो सोशल मीडियात शेअर केल्यानंतर त्यावर लाईक्सचा वर्षाव होत आहे. दरम्यान, प्रवासादरम्यान सुजय विखे आणि पार्थ पवार यांच्यामध्ये छान गप्पांची मैफल रंगली होती. यात राजकीय घडामोडींसह इतर विषयांवर चर्चा झाल्याची माहिती सुत्रांनी दिली.