"२० वर्षांनी आम्ही भाऊ एकत्र येऊ शकतो, मग..."; मनसे मेळाव्यात राज ठाकरेंचा कार्यकर्त्यांना कानमंत्र

या मेळाव्यात राज ठाकरे यांनी महापालिका निवडणुकीच्या तयारीबाबत कार्यकर्त्यांना मार्गदर्शन केले.

मुंबई - आगामी महापालिका निवडणुकीच्या दृष्टीने मनसे प्रमुख राज ठाकरे यांनी पदाधिकाऱ्यांचा मेळावा घेतला. या मेळाव्याला मनसेचे पदाधिकारी वगळता कुठल्याही प्रसार माध्यमांना आत प्रवेश दिला नाही. या मेळाव्यात राज ठाकरे यांनी कार्यकर्त्यांना निवडणुकीचा कानमंत्र दिल्याचं बोललं जात आहे. २० वर्षांनी आम्ही भाऊ एकत्र येऊ शकतो, मग तुम्ही एकमेकांमध्ये का भांडता? असं विचारत राज यांनी कार्यकर्त्यांना मनपा निवडणुकीच्या तयारीला लागण्याचे आदेश दिले आहेत. 

या मेळाव्यात राज ठाकरे यांनी महापालिका निवडणुकीच्या तयारीबाबत कार्यकर्त्यांना मार्गदर्शन केले. विशेषत: मतदार यांद्यांवर लक्ष देण्याच्या सूचना राज यांनी केल्या आहेत. मतदार यादी तपासा, जुने कार्यकर्ते आहेत त्यांना सोबत घेऊन तुम्ही एकत्र काम केले पाहिजे. जर २० वर्षांनी आम्ही दोन भाऊ एकत्र येऊ शकतो मग पदाधिकाऱ्यांनी एकमेकांमध्ये कुठलाही वाद घालू नका. कार्यकर्त्यांनी वाद न घालता एकत्रित निवडणुकीची तयारी केली पाहिजे. लोकांशी संपर्क वाढवण्यावर भर द्या अशा सूचनाही राज ठाकरेंनी दिल्या आहेत. जवळपास ३०-४० मिनिटे राज यांनी कार्यकर्त्यांना कानमंत्र दिला आहे.

तसेच या मेळाव्यात राज ठाकरे यांनी ठाकरे बंधू एकत्रित निवडणूक लढवण्याबाबत काही संकेत दिले नाहीत. मात्र आपला मनसेचा कार्यकर्ता कसा पुढे जाईल. महापालिकेची तयारी कशी करेल याबाबत त्यांनी मार्गदर्शन केले. परंतु २० वर्षांनी दोन भाऊ एकत्र येत असतील तर आपण एकमेकांमध्ये भांडण किंवा वाद करू नका असं विधान त्यांनी केले आहे. या मेळाव्यानंतर कुठल्याही पदाधिकाऱ्याला माध्यमांशी संवाद साधण्यास मनाई केली होती. याआधी युतीवर भाष्य करायचे नाही अशा सूचनाही पक्षाकडून सगळ्यांना देण्यात आल्या होत्या. 

दरम्यान, अत्यंत खेळीमेळीच्या वातावरणात राज ठाकरे यांनी कार्यकर्त्यांना सूचना केल्या आहेत. कार्यकर्त्यांनीही त्यांच्या सूचना हात वर करून मान्य केल्या आहेत. युतीबाबत कुठलीही चर्चा झाली नाही. आपण एकमेकांना मानसन्मान दिला पाहिजे. आपण कसं वागतो, त्यावरही लक्ष दिले पाहिजे. माजी पदाधिकारी, उमेदवार होते, काही घरी बसलेले आहेत. तुम्हाला आवडत नाही, पटत नाही मात्र तो पक्षाचा कार्यकर्ता आपला आहे. तो कार्यकर्ता आपल्यासोबत घेतला पाहिजे. त्याला विश्वास दिला पाहिजे अशी सूचना राज ठाकरेंनी कार्यकर्त्यांना दिल्याची माहिती मनसे नेते बाळा नांदगावकर यांनी माध्यमांना दिली.