पुन्हा ‘एक मराठा, लाख मराठा’ घोषणा घुमणार? मनोज जरांगे पाटील यांनी दिला आंदोलनाचा इशारा

Manoj Jarange Patil News: मराठा आरक्षणावरून सरकारमधील काहींची पोटदुखी असू शकते. मात्र गोरगरीबांचा अवमान सहन केला जाणार नाही, असे मनोज जरांगे पाटील यांनी म्हटले आहे.

Manoj Jarange Patil News: मराठा आंदोलनाचे नेतृत्व करणारे मनोज जरांगे पाटील यांनी अद्यापही प्रमाणपत्रांचे अपेक्षित पद्धतीने वाटप होत नसल्याबाबत पुन्हा एकदा आक्रमक भूमिका घेतली आहे. अधिवेशनानंतर ठोस निर्णय झाला नाही, तर पुन्हा आंदोलन उभे करण्याचा इशारा मनोज जरांगे पाटील यांनी दिला असल्याचे म्हटले जात आहे. 

महसूलमंत्री राधाकृष्ण विखे पाटील यांच्याशी चर्चा केली. कॅबिनेटमध्ये हा विषय घेतो, असे आश्वासन दिले आहे. एकनाथ शिंदे आणि विखे पाटील यांनी मराठवाड्यातील सर्व मराठे कुणबी असल्याचे मान्य करून गॅझेटनुसार आरक्षण देऊ असे म्हटले होते. मात्र अर्ज देऊनही प्रमाणपत्र आणि व्हॅलिडिटी जाणूनबुजून दिली जात नाही, असा दावा मनोज जरांगे पाटील यांनी केला आहे. 

शिंदे समितीला मुदतवाढ देऊनही नोंदी का सापडत नाहीत?

अधिवेशनानंतर प्रमाणपत्र वाटपाचा निर्णय झाला नाही तर आम्हाला पुन्हा आंदोलन करावे लागेल. त्याची मोठी राजकीय किंमत मोजावी लागेल. शिंदे समितीला मुदतवाढ देऊनही नोंदी का सापडत नाहीत? याचे उत्तर द्यावे; अन्यथा आंदोलन अपरिहार्य होईल. मराठा आरक्षणावरून सरकारमधील काहींची पोटदुखी असू शकते. मात्र गोरगरीबांचा अवमान सहन केला जाणार नाही, असे मनोज जरांगे पाटील यांनी स्पष्ट केले. 

दरम्यान, रक्ताने हात भरलेल्या लोकांना सरकार का सांभाळेल? भाजपमध्ये गेले तरी भाजप का मंत्रीपद देईल? संतोष देशमुख यांना अजून न्याय नाही. फक्त मंत्रिपद द्यायचे म्हटले होते तर अजितदादांचा पक्ष एवढा ट्रोल झाला. त्यामुळे मंत्रिपद दिले तर पक्ष संपेल. रक्ताने हात भरलेल्या लोकांवर कधीच बोलायचे नाही यामुळे माझा दिवस चांगला जात नाही. आम्ही पूर्ण माहिती घेत आहोत. धनंजय मुंडे यांनी आमच्या नादी लागू नये. मी जर मागे लागलो तर माझ्याजवळ २२ पेक्षा अधिक प्रकरण आलेली आहेत, असा इशारा मनोज जरांगे पाटील यांनी धनंजय मुंडे यांना दिला.