मुंबई : ‘लोकमत’चे समूह संपादक विजय बाविस्कर यांना राज्य सरकारचा ‘लोकमान्य टिळक जीवनगौरव’ पुरस्कार जाहीर झाला आहे. बाविस्कर यांच्या ‘लोकमत’मधील ४० वर्षांच्या अविरत सेवेचा गौरव राज्य सरकारने यानिमित्ताने केला आहे.
यासोबतच राही भिडे- २०१९, सुधीर पाठक- २०२०, भाऊ तोरसेकर- २०२१, बाळासाहेब जाधव- २०२३ या ज्येष्ठ पत्रकारांनाही जीवनगौरव पुरस्कार जाहीर झाला आहे. बाविस्कर यांना २०२२च्या जीवनगौरव पुरस्काराने सन्मानित केले जाणार आहे. एक लाख रुपये, सन्मानचिन्ह आणि प्रशस्तिपत्र, असे या पुरस्काराचे स्वरूप आहे.
विजय बाविस्कर हे गेली ४० वर्षे ‘लोकमत’मध्ये कार्यरत असून प्रशिक्षणार्थी उपसंपादक ते समूह संपादक, असा त्यांचा प्रवास राहिला आहे. बाविस्कर यांना ‘लोकमत अचिव्हर्स अवॉर्ड्स २०२४-२५’अंतर्गत अलीकडेच ‘लोकमत जीवनगौरव’ पुरस्काराने सन्मानित करण्यात आले होते.
‘लोकमत’चा चौफेर गौरव : राज्य सरकारने पत्रकारांसाठीच्या २०१९, २०२०, २०२१, २०२२ आणि २०२३ मधील राज्य आणि विभागीय पुरस्कारांचीही मंगळवारी घोषणा केली. पुरस्कार विजेत्यांमध्ये ‘लोकमत’च्या विविध आवृत्त्यांमधील सहकाऱ्यांचा समावेश आहे.
सर्वोत्कृष्ट अग्रलेखासाठीचा सुधाकरराव डोईफोडे पुरस्कार- २०२२ (५१ हजार रुपये) लोकमत नागपूरचे संपादक श्रीमंत माने यांना जाहीर झाला आहे. सर्वोत्कृष्ट छायाचित्रासाठीचा राज्यस्तरीय तोलाराम कुकरेजा पुरस्कार हा २०१९ व २०२२ साठी (प्रत्येकी ५१ हजार रुपये) लोकमत नाशिकचे छायाचित्रकार प्रशांत खरोटे यांना प्रदान करण्यात येणार आहे. तोलाराम कुकरेजा उत्कृष्ट छायाचित्रकार राज्य पुरस्कार (२०२०) लोकमत नांदेडचे सचिन मोहिते (५१ हजार रुपये) यांना जाहीर झाला आहे. विभागीय पुरस्कारांमध्ये दादासाहेब पोतनीस पुरस्कार लोकमत जळगावचे कुंदन पाटील, अनंतराव भालेराव पुरस्कार, लोकमत लातूरचे हरी मोकाशे, ग. गो. जाधव पुरस्कार लोकमत सिंधुदुर्गचे महेश सरनाईक, शि. म. परांजपे पुरस्कार, लोकमत रत्नागिरीचे अरुण आडिवरेकर व लोकनायक बापूजी अणे पुरस्कार- २०२२ लोकमत अमरावतीचे गजानन मोहोड, आचार्य अत्रे पुरस्कार लोकमत मुंबईचे सचिन लुंगसे, ग. त्र्यं. माडखोलकर पु्रस्कार लोकमत नागपूरचे योगेश पांडे व लोकमत चंद्रपूरचे राजेश बारसागडे (२०२३), ग. गो. जाधव पुरस्कार (२०१९) लोकमत कोल्हापूरचे भारत चव्हाण, दादासाहेब पोतनीस पुरस्कार लोकमत नंदुरबारचे मनोज शेलार यांचा समावेश आहे.
तसेच तोलाराम कुकरेजा राज्यस्तरीय पुरस्कार- २०२३ छायाचित्रकार राजू ठाकरे यांना आणि लोकनायक बापूजी अणे विभागीय पुरस्कार अविनाश साबापुरे यांना अनुक्रमे ‘लोकमत’मधील त्यांचे छायाचित्र आणि वृत्तांकनासाठी जाहीर झाला आहे.