आदर्श फेम अधिकारी ‘साइड’ला

आदर्श प्रकरणात दोन वर्षांच्या निलंबनानंतर प्रशासकीय सेवेत सामावून घेण्यात आलेले ज्येष्ठ सनदी अधिकारी जयराज फाटक आणि प्रदीप व्यास यांना कमी महत्वाच्या जागी नियुक्ती देण्यात आली आहे.

मुंबई : आदर्श प्रकरणात दोन वर्षांच्या निलंबनानंतर प्रशासकीय सेवेत सामावून घेण्यात आलेले ज्येष्ठ सनदी अधिकारी जयराज फाटक आणि प्रदीप व्यास यांना कमी महत्वाच्या जागी नियुक्ती देण्यात आली आहे. आठ सनदी अधिकार्‍यांच्या बदल्यांचे आदेश शासनाने शुक्रवारी दिले. यात जयराज फाटक यांची महाराष्ट्र पेट्रोकेमिकल्स महामंडळाच्या व्यवस्थापकीय संचालकपदी नेमणूक करण्यात आली, तर प्रदीप व्यास यांची उर्वरित महाराष्ट्र वैधानिक महामंडळाच्या सदस्य सचिवपदी नियुक्ती करण्यात आली. आदर्श प्रकरणात ठपका ठेवण्यात आल्यामुळे २२ मार्च २०१२ ला दोन्ही अधिकार्‍यांवर निलंबनाची कारवाई करण्यात आली होती़ अलीकडेच राज्य शासनाने दोन्ही अधिकार्‍यांना पुन्हा सेवेत सामावून घेण्याचे आदेश दिले. नियमानुसार या अधिकार्‍यांना दोन वर्षांहून अधिक काळ निलंबित करता येत नसल्याने निर्णय घेण्यात आल्याचे स्पष्टीकरण या वेळी देण्यात आले. या दोन्ही अधिकार्‍यांविरुद्ध सीबीआय चौकशी तसेच विभागीय चौकशी सुरू आहे. या अधिकार्‍यांना पदभार देताना चौकशी प्रभावित होणार नाही, अशीच जबाबदारी सोपवण्यात येईल, असे मुख्यमंत्री पृथ्वीराज चव्हाण यांनी जाहीर केले होते. त्यानुसार, तुलनेने कमी महत्त्वाच्या आणि दुय्यम मानल्या जाणार्‍या पदांवर या अधिकार्‍यांची नियुक्ती करण्यात आल्याचे सांगण्यात येत आहे. फाटक आणि व्यास यांच्यासोबतच अन्य सहा अधिकार्‍यांच्या बदल्या करण्यात आल्या. यामध्ये ए.बी. कुलकर्णी- व्यवस्थापकीय संचालक, राज्य वित्तीय महामंडळ, मनिषा शर्मा- सचिव व आयुक्त, महाराष्ट्र सदन, नवी दिल्ली, एस़बी. पाटील- व्यवस्थापकीय संचालक, माविम, संजय खंदारे-उपाध्यक्ष व व्यवस्थापकीय संचालक, राज्य परिवहन महामंडळ, एस.पी. कडू-पाटील- सचिव, राज्य मानवी हक्क आयोग, सोनाली पोंक्षे-वायंगणकर- अतिरिक्त विभागीय आयुक्त नाशिक विभाग समावेश आहे़ (प्रतिनिधी)