सिंधुदुर्गातील घनदाट जंगलात सापडला मानवी सांगाडा, मृतदेह कुणाचा? तपासातून समोर आली धक्कादायक माहिती

Sindhudurg Crime News: सिंधुदुर्ग जिल्ह्यातील मालवण तालुक्यात असलेल्या नांदोस गावातील घनदाट जंगलांमध्ये एक मानवी सांगाडा सापडल्याने खळबळ उडाली आहे. या मृतदेहाजवळ सापडलेल्या वस्तूंवरून मृत व्यक्तीबाबतची माहिती समोर आली आहे.

सिंधुदुर्ग जिल्ह्यातील मालवण तालुक्यात असलेल्या नांदोस गावातील घनदाट जंगलांमध्ये एक मानवी सांगाडा सापडल्याने खळबळ उडाली आहे. जंगली प्राण्यांनी या मृतदेहाचे लचके तोडल्याने मृतदेहाचे काही अवशेषच उरले असून, या सांगाड्याच्या अवतीभवती सापडलेला एक मोबाईल आणि अन्य वस्तूंच्याद्वारे पोलिसांनी माहिती काढली असता हा मृतदेह मालवणमधील कट्टा येथील एका हॉटेलमध्ये काम करणाऱ्या नेपाळी तरुणाचा असल्याचे समोर आले आहे. तसेच या मृत तरुणाच्या भावानेही या वस्तूंची ओळख पटवली आहे.

याबाबत मिळालेल्या अधिक माहितीनुसार मालवण तालुक्यातील नांदोस सुतारवाडीच्या जवळील जंगलमय भागात आज सकाळी हा पुरुष जातीचा सडलेल्या अवस्थेतील मृतदेह सापडला आहे. या भागात सडलेल्या मृतदेहामुळे दुर्गंधी पसरली आहे. या मृतदेहाच्या शरीराचे काही भाग जंगली प्राण्यांनी खाल्ल्याने या मृतदेहाचा सांगाडा शिल्लक राहिला आहे. हा मृतदेह सापडला, त्या ठिकाणाजवळ असलेल्या एका झाडाला एक साधी दोरी लटकलेली असल्याचे आढळून आले. त्याशिवाय निळ्या काळसर रंगाची ट्रॅक पॅन्ट आहे. तसेच बाजूला पांढऱ्या रंगाची चप्पल व टीशर्ट पडलेले आहे. एक बॅग आणि मोबाईल अशा वस्तू आढळून आल्या.

दरम्यान, ग्रामस्थांनी याबाबत मालवण पोलिसांना माहिती दिल्यानंतर पोलिसांनी घटनास्थळी धाव घेत पुढील तपासाला सुरुवात केली. हा मृतदेह २० ते २५ दिवसांपूर्वीचा असावा, असा अंदाज पोलिसांनी वर्तवला आहे. दरम्यान, मृतदेहाजवळ सापडलेल्या वस्तूंवरून पोलिसांनी तपास केला असता हा मृतदेह एका नेपाळी तरुणाचा असल्याची प्राथमिक माहिती समोर आली आहे. तसेच या मृत तरुणाच्या भावाने घटनास्थळी सापडलेल्या वस्तूंची ओळख पटवली आहे.

धक्कादायक बाब म्हणजे नांदोस गावातील याच डोंगरात सुमारे २२ वर्षांपूर्वी पैशाचा पाऊस पडतो, असे आमिष दाखवून निर्जन ठिकाणी आणून दहा जणांची निर्घृण हत्या करण्यात आली होती. शनिवारी याच डोंगरात मृतदेह सापडल्याने प्रचंड खळबळ माजली आहे. तसेच जुन्या घटनेची आठवणही जागी झाली आहे.