मालेगावमध्ये काँग्रेस आमदाराच्या काकांवर गोळीबार

रात्री उशिरा त्यांना शहरातील खाजगी रुग्णालयात उपचारार्थ दाखल करण्यात आले. 

मालेगाव (नाशिक) : शहरातील उद्याने शिवारातील विद्युत उपकेंद्राजवळ रात्री दीडच्या सुमारास माजी स्थायी समिती सभापती शेख खलील शेख शफी यांच्यावर गोळीबार करण्यात आला. सुदैवाने त्यांच्या उजव्या हाताच्या मनगटाला गोळी चाटून गेल्याने जीव वाचला. रात्री उशिरा त्यांना शहरातील खाजगी रुग्णालयात उपचारार्थ दाखल करण्यात आले. 

घटनेची माहिती कळताच काँग्रेस समर्थकांनी रुग्णालयासमोर मोठ्या प्रमाणावर गर्दी केली होती. पोलीस उप अधिक्षक रत्नाकर नवले यांनी पहाटे चार वाजता घटनास्थळी व रुग्णालयात भेट देऊन पाहणी केली.

खलिल शेख हे मनपाचे विद्यमान महापौर रशीद शेख यांचे धाकटे बंधू तर मालेगाव मध्यचे आमदार आसिफ शेख यांचे काका आहेत. याप्रकरणी रमजानपुरा पोलीस ठाण्यात गुन्हा दाखल करण्याचे काम सकाळपर्यंत सुरू होते. 

मालेगाव शहरात गुन्हेगारीने डोकेवर काढले असल्याचे पुन्हा सिद्ध झाले आहे. 28 सप्टेंबर रोजी कुख्यात गुंड देसीदादा याची हत्या करण्यात आली होती. मागील 10 दिवसांत पोलिसांनी तीन वेळा शहरात धारदार शस्त्रास्त्रे हस्तगत केली आहे. त्यामुळे गुन्हेगारांवर पोलिसांचा कुठलाही वचक शिल्लक नसल्याचे घडलेल्या घटनांवरून अधोरेखित होत आहे.