जेजुरीत मशिदीत आठ दिवसांचे अर्भक सापडले

येथील शहराच्या मध्यवर्ती ठिकाणी असलेल्या मशिदीत आज सकाळी साडेअकरा वाजण्याच्या सुमारास ६ ते ८ दिवसांचे अर्भक आढळून आले

जेजुरी : येथील शहराच्या मध्यवर्ती ठिकाणी असलेल्या मशिदीत आज सकाळी साडेअकरा वाजण्याच्या सुमारास ६ ते ८ दिवसांचे अर्भक आढळून आले. मशिदीतील मौलाना हबीब शेख यांनी दोन अनोळखी महिला मशिदीत आल्या होत्या, त्यांनीच हे मूल दर्ग्याशेजारी ठेवल्याचा संशय व्यक्त केला आहे. अर्भकाशेजारी एक दुधाची बाटलीही आढळून आली. त्यांनी स्थानिक कार्यकर्ते आशिफ पानसरे यांना माहिती दिली. त्यांनी जेजुरी पोलिसांना ही घटना कळविली. पोलिसांनी हे पुरुष जातीचे अर्भक ताब्यात घेऊन ग्रामीण रुग्णालयात दाखल केले. वैद्यकीय अधिकारी स्नेहा ससाणे यांनी हे अर्भक ६ ते ८ दिवसांचे असल्याचे सांगितले. दोन अनोळखी महिलांविरोधात पोलिसांनी भा.दं.वि. ३१७, ३४ अन्वये गुन्हा दाखल केला आहे. या महिला व अर्भकाविषयी कोणाला माहिती असल्यास जेजुरी पोलीस ठाण्याशी संपर्क साधण्याचे आवाहन करण्यात आले आहे. (वार्ताहर)