कोरोनावर मात करून कामाला सुरुवात; मुंडेंनी शरद पवारांकडे सादर केला कार्य अहवाल

धनंजय मुंडेंकडून कार्य अहवाल सादर; शरद पवारांकडून कौतुकाची थाप

मुंबई : कोरोनावर मात करून पुन्हा सक्रिय झालेल्या सामाजिक न्याय मंत्री धनंजय मुंडेंनी त्यांच्या कामाचा अहवाल राष्ट्रवादीचे अध्यक्ष शरद पवार यांच्याकडे सादर केला. जून ते ऑगस्ट या कालावधीत केलेल्या कामाचा अहवाल मुंडेंनी तयार केला आहे. मुंडेंनी केलेल्या कामाचा अहवाल पाहून शरद पवारांनी त्यांचं कौतुक केलं.

धनंजय मुंडेंनी आज यशवंतराव चव्हाण सेंटर येथे शरद पवार यांच्याकडे कोरोनावर मात केल्यानंतर जून ते ऑगस्ट या तीन महिन्यांत केलेल्या कामकाजाचा अहवाल सादर केला. हा कार्य अहवाल मुख्यमंत्री उद्धव ठाकरे, उपमुख्यमंत्री अजित पवार, जलसंपदा मंत्री आणि राष्ट्रवादीचे प्रदेशाध्यक्ष जयंत पाटील यांनाही सादर केला जाणार आहे. परळी, बीड व मुंबई असा सातत्याने प्रवास, अनेक लोकांशी थेट संपर्क यादरम्यान जून महिन्याच्या पहिल्या आठवड्यात मुंडेना कोरोनाचा संसर्ग झाला होता. त्यावेळी लॉकडाऊनच्या काळात केलेल्या कामकाजाचा अहवाल त्यांनी कोरोना वॉर्डमधून सादर केला होता. कोरोनावर मात करून आल्यानंतर दुसऱ्याच दिवशी धनंजय मुंडे परत कामाला लागले होते.

सामाजिक न्याय मंत्री म्हणून दर महिन्याला केलेल्या कामकाजाचा लेखाजोखा अहवाल स्वरूपात सादर करण्याची मी परंपरा सुरू केली. @PawarSpeaks@AjitPawarSpeaks
@Jayant_R_Patil@supriya_sulehttps://t.co/ibsvE6lYd4pic.twitter.com/3fXo15bUja

— Dhananjay Munde (@dhananjay_munde) September 9, 2020

लॉकडाऊनच्या कठीण काळात वंचित-निराधार, दिव्यांग आदींना सामाजिक न्याय विभागाच्या माध्यमातून भरीव मदत करता आली. प्रत्येक जिल्ह्यात उभारलेल्या कोरोना मदत कक्षाद्वारे हजारो दिव्यांग बांधवांना मदत करता आली. बीड जिल्ह्यातील पीक विम्याचा गंभीर प्रश्न सोडवून जिल्ह्यातील शेतकऱ्यांनी विक्रमी पीकविमा प्रस्ताव भरले. जिल्ह्यातील शासकीय कापूस खरेदीने मागील दहा वर्षातला उच्चांक गाठला याबाबत मुंडेंनी अहवालाच्या सुरुवातीला व्यक्त केलेल्या मनोगताद्वारे समाधान व्यक्त केले आहे. तर शेतकरी कर्जमाफी व त्याला अनुसरून सुरू असलेले पीककर्जाचे वाटप, त्यावर असलेले बारीक लक्ष तसेच बँकांची उदासीनता यावर चिंताही व्यक्त केली आहे.

दरम्यान, मुंडे यांनी सादर केलेल्या जून ते ऑगस्ट २०२० च्या ४९ पानी अहवालामध्ये त्यांच्या विभागामार्फत नुकतेच घोषित केलेले नवउद्योजकांसाठीचे १०० कोटींचे पॅकेज, स्वाधार योजनेतील आर्थिक तरतूद, बीएएनआरएफ अधिछात्रवृत्ती यासह विभागातील महत्वाचे निर्णय, बैठका आदींची सविस्तर माहिती देण्यात आली आहे. त्याचबरोबर बीड जिल्ह्यातील कोविडची सद्यस्थिती, नुकत्याच सुरू करण्यात आलेल्या जम्बो कोविड हॉस्पिटलची माहिती यासह पीकविमा, कापूस खरेदी आदी सर्वच बाबींवर प्रकाश टाकला आहे.

मंत्रीपदाचा पदभार स्वीकारल्यापासून अविरतपणे कार्य अहवाल सादर करून त्याद्वारे पक्षाला, राज्य सरकारला तसेच राज्यातील तमाम जनतेला जाहीरपणे आपली कामे अहवाल स्वरूपात सादर करण्याची अभिनव परंपरा जपल्याबद्दल मुंडे यांचे शरद पवार यांनी विशेष कौतुक केले आहे. तसेच पुढेही ही परंपरा अबाधित ठेवावी असा सल्ला पवारांनी मुंडे यांना दिला आहे.