नाशिक - आगामी महापालिका निवडणुकीच्या दृष्टीने भारतीय जनता पार्टीने तयारीला सुरुवात केली आहे. त्यात नुकतेच उद्धवसेनेचे नेते सुधाकर बडगुजर, बबनराव घोलप यांनी भाजपात प्रवेश केला. त्यानंतर आता उत्तर महाराष्ट्रातील आणखी २ माजी आमदार भाजपात प्रवेश करणार आहे. येत्या १ आणि २ तारखेला हे पक्षप्रवेश पार पडणार आहे. त्यामुळे स्थानिक स्वराज्य संस्थांच्या निवडणुकीपूर्वी भाजपाची ताकद वाढणार आहे.
अलीकडेच धुळ्याचे आमदार कुणाल पाटील यांनी मंत्री जयकुमार रावल यांची भेट घेतली होती. या भेटीनंतर ते भाजपात जातील अशी चर्चा होती. आता मंगळवारी १ जुलैला कुणाल पाटील अधिकृतपणे भाजपात प्रवेश करणार आहेत. २०१४ ची विधानसभा आणि २०२४ च्या लोकसभा निवडणुकीतच मुख्यमंत्री देवेंद्र फडणवीस यांनी स्वत: मला पक्षात येण्याची ऑफर दिली होती असा दावाही कुणाल पाटील यांनी केला आहे. कोणताही शब्द, आश्वासन न घेता भाजपात जात आहे. प्रवेशासाठी कार्यकर्त्यांचाच आग्रह आहे असं कुणाल पाटील यांनी सांगितले.
कोण आहे कुणाल पाटील?
कुणाल पाटील हे काँग्रेसचे ज्येष्ठ नेते स्व. रोहिदास पाटील यांचे चिरंजीव असून मागील ३ पिढ्यांपासून त्यांचे कुटुंब काँग्रेसमध्ये सक्रीय राहिले आहे. मागील २ महिन्यापासून कुणाल पाटील काँग्रेस सोडून भाजपात दाखल होण्याच्या चर्चा होत्या. मात्र पाटील यांनी अगदी २ दिवसापर्यंत या चर्चांना नकार दिला होता. परंतु समर्थकांच्या मेळाव्यात देखील कुणाल पाटील यांनी भाजपा प्रवेशाबाबत कुठलीही अधिकृत घोषणा केली नव्हती. आता ते भाजपात प्रवेश करणार असल्याचे स्पष्ट झाले आहे.
दरम्यान, नाशिकमधील राष्ट्रवादी काँग्रेस पक्षाचे माजी आमदार आणि प्रदेश उपाध्यक्ष अपूर्व हिरे हेदेखील बुधवारी २ तारखेला मुंबईत भाजपाच्या प्रदेश कार्यालयात समर्थकांसह भाजपात प्रवेश करत आहेत. भाजपाचे राष्ट्रीय अध्यक्ष जे.पी. नड्डा यांनी दूरध्वनी करून डॉ. हिरे यांना पक्षात अधिकृत प्रवेशासाठी आमंत्रित केल्याची माहिती हिरे यांनी दिली. याबाबत मुख्यमंत्री देवेंद्र फडणवीस, जलसंपदा मंत्री गिरीश महाजन यांची मुंबईत भेट घेऊन चर्चा झाली असून त्यानंतर पक्षात अधिकृत प्रवेश करण्याचे ठरले असं हिरे यांनी म्हटलं.