फडणवीस, महाजनांमुळे माझं तिकीट कापलं; खडसेंकडून पहिल्यांदाच नाव घेऊन गंभीर आरोप

माझं राजकारण संपवण्याचा डाव; खडसेंचे फडणवीस-महाजनांवर गंभीर आरोप

मुंबई: माजी मुख्यमंत्री देवेंद्र फडणवीस आणि गिरीश महाजन यांनी माझं तिकीट कापलं, असा खळबळजनक दावा भाजपाचे ज्येष्ठ नेते आणि माजी मंत्री एकनाथ खडसेंनी केला आहे. याआधी खडसे फडणवीस आणि महाजन यांच्यावर अप्रत्यक्ष आरोप करत होते. मात्र आता पहिल्यांदाच त्यांनी थेट फडणवीस आणि महाजन यांच्यावर नाव घेऊन आरोप केले आहेत. माझं राजकारण संपवण्यासाठी जाणीवपूर्वक प्रयत्न केले गेले, असा अतिशय गंभीर आरोप खडसेंनी केला आहे. यामुळे भाजपामधील अंतर्गत कलह चव्हाट्यावर आला आहे.देवेंद्र फडणवीस आणि गिरीश महाजन यांच्यावर गंभीर आरोप करताना खडसेंनी कोअर कमिटीतील चर्चेचा संदर्भ दिला. 'कोअर कमिटीमध्ये तिकीट वाटपावर चर्चा झाली. त्यामध्ये 17-18 सदस्य होते. यातील अनेकजण माझ्या ओळखीचे होते. त्यांनी या बैठकीत झालेल्या घटनांची माहिती मला दिली. मला विधानसभेची उमेदवारी देण्यासंदर्भात फडणवीस आणि महाजन यांनी नाराजी व्यक्त केली होती. यानंतर पुढे काय झालं, याची तुम्हाला कल्पनाच आहे,' असं खडसेंनी 'एबीपी माझा' या वृत्तवाहिनीला दिलेल्या मुलाखतीत म्हटलं. स्वत:चं राजकारण सरळ करण्यासाठी माझं राजकारण संपवण्याचा जाणीवपूर्वक प्रयत्न केला गेला, असा आरोप खडसेंनी केला. मला तिकीट का नाकारण्यात आलं, माझी चूक काय, याची विचारणा मी पक्षाकडे केली होती. मात्र मला समाधानकारक उत्तरं देण्यात आली नाही, असं खडसे म्हणाले. आधी प्रचारात संपूर्ण टीम काम करायची. यंदा मात्र केवळ देवेंद्र फडणवीस सगळीकडे प्रचारासाठी फिरत होते. नितीन गडकरीदेखील फारसे प्रचारात नव्हते. सुधीर मुनगंटीवार, प्रदेशाध्यक्ष चंद्रकांत पाटील त्यांच्या मतदारसंघात अडकून पडल्यानं त्यांनादेखील प्रचार करता आला नाही, असं खडसे म्हणाले.विधानसभा निवडणुकीवेळी जनाधार असलेल्या अनेक नेत्यांची तिकीटं कापण्यात आली, असं खडसे यांनी म्हटलं. निवडून येण्याची खात्री असलेल्या अनेकांना उमेदवारी नाकारण्यात आली. त्यामुळे अनेक ठिकाणी बंडखोरी झाली. याचा अंतिमत: फटका पक्षालाच बसला. आमच्या काही जागा पडल्या, असं म्हणत खडसेंनी तिकीट वाटपावेळी झालेल्या अन्यायावर पुन्हा एकदा भाष्य केलं.