निवडणूक आयोगाचा मोठा निर्णय! राज्यातील काही ठिकाणच्या निवडणुका पुढे ढकलल्या; कारण काय?

स्थानिक स्वराज्य संस्थांच्या निवडणुका सुरू आहेत. नगरपालिका, नगर परिषदांच्या निवडणुका सुरू आहेत. राज्यभरात प्रचारसभा सुरू आहेत.  दरम्यान, राज्यातील काही निवडणुका पुढे ढकलण्यात आल्याचे निवडणूक आयोगाने सांगितले आहे. यामुळे आता या ठिकाणच्या निवडणुका पुढील काही दिवसांनी होणार आहेत. यामध्ये बदलापूर, अंबरनाथ, बारामती यासह आणखी काही शहरातील निवडणुका पुढे ढकलल्या आहेत.  

'निवडणुका काही वार्डात अचानक स्थगित करणे हा लोकशाहीला धक्का देणारा निर्णय'; यशोमती ठाकुर यांचा हल्लाबोल

नगरपरिषद निवडणुकांमध्ये अर्ज अवैध ठरल्यानंतर उमेदवारांनी दाखल केलेल्या दाव्यांवरती उशिरा लागलेला निकाल, अर्ज मागे घेण्यासाठी मिळालेला कमी कालावधी आणि अशा प्रक्रियेत आधीच वाटप झालेले चिन्ह या सर्व गोष्टींमुळे राज्य निवडणूक आयोगाने अशा ठिकाणी नगरपरिषद निवडणूक स्थगित करण्याचे आदेश दिले आहेत. 
 
राज्यातील २० नगरपालिकांमध्ये निवडणुका पुढे ढकलल्या

राज्यातील साधारण २० जिल्ह्यातील काही नगरपालिकांच्या प्रभागात निवडणुका पुढे ढकलण्यात आल्याने कार्यकर्त्यांचा हिरमोड झाला आहे. त्यामध्ये, पुणे, सोलापूर, चंद्रपूर, यवतमाळ, अहिल्यानगर, धाराशिव, नांदेड, ठाणे जिल्ह्याचा समावेश आहे. दरम्यान, राज्यात २ डिसेंबर रोजी नगरपालिका निवडणुकांसाठी मतदान होत असून ३ डिसेंबर रोजी निकाल जाहीर होणार आहे. 

अंबरनाथ आणि बदलापूरातही स्थिगिती

ठाणे जिल्ह्यातील अंबरनाथ परिषदेच्या निवडणुकीतही याचा फटका बसला. तर कुळगाव बदलापूर नगर परिषदेतील सहा प्रभागांमध्ये निवडणूक स्थगित झाली आहे. ही निवडणूक आता २० दिवस लांबणीवर गेली असून पूर्वी २ डिसेंबरला होणारे मतदान आता २० डिसेंबरला होणार आहे. 

यवतमाळ

यवतमाळ जिल्ह्यातील यवतमाळ नगरपरिषदेचीही निवडणूक लांबणीवर पडण्याची शक्यता आहे. येथील दिग्रस पांढरकवडा आणि वणी येथील काही प्रभागांची निवडणूक लांबणीवर जाण्याची चिन्हे आहेत. ज्या ठिकाणी तांत्रिक चुका झाल्या तेथे निवडणुकीसंदर्भात निवडणूक आयोगानं नव्याने कार्यक्रम दिला असून आता निवडणुक २० डिसेंबरला होणार आहेत. 

अहिल्यानगर

अहिल्यानगर जिल्ह्यातील ४ नगरपरिषद निवडणुका पुढे ढकलल्या आहेत. कोपरगाव, देवळाली, नेवासा आणि पाथर्डी या चार ठिकाणी नगराध्यक्षपदाच्या उमेदवाराबद्दल कोर्टात अपील असल्याने नगरपरिषद निवडणूक पुढे ढकलली आहे. त्याबरोबरच सात नगरसेवक पदाच्या उमेदवाराबाबत कोर्टात अपील असल्याने त्या ठिकाणी देखील मतदान प्रक्रिया पुढे ढकलण्यात आली आहे. पुढे ढकललेल्या नगरपरिषद आणि नगरसेवक पदाच्या निवडणूक प्रक्रियेमध्ये १० डिसेंबरपर्यंत माघार घेण्यासाठी मुदत, तर २० डिसेंबर मतदान आणि २१ डिसेंबर रोजी मतमोजणी होणार असल्याची माहिती आहेत.  

सोलापूर 

जिल्ह्यातील मंगळवेढा नगरपालिका सुधारीत कार्यक्रम

नामनिर्देश मागे घेण्याची अंतिम मुदत १० डिसेंबर 

चिन्ह वाटप व अंतिम यादी ११ डिसेंबर 

मतदान २० डिसेंबर 

मतमोजणी २१ डिसेंबर, असा कसुधारित कार्यक्रम जाहीर करण्यात आला आहे.

धाराशिव

धाराशिव नगरपालिकेतील तीन जागांसाठी (प्रभाग क्र. २ अ, ७ ब आणि १४ ब) अखेर सुधारित निवडणूक कार्यक्रम राज्य निवडणूक आयोगाने २९ नोव्हेंबर रोजी उशिरा जाहीर केला. 

सुधारित निवडणूक कार्यक्रम

जिल्हाधिकारीांनी निवडणूक कार्यक्रम जारी करण्याची तारीख : ०४ डिसेंबर २०२५

नामनिर्देशनपत्रे मागे घेण्याचा अंतिम दिनांक :
१० डिसेंबर २०२५, दुपारी ३.۰۰ वाजेपर्यंत

निवडणूक चिन्ह वाटप व अंतिम उमेदवारांची यादी प्रसिद्ध करण्याचा दिनांक :
११ डिसेंबर २०२५

आवश्यक असल्यास मतदानाचा दिनांक :
२० डिसेंबर २०२५
(सकाळी ७.३० ते सायंकाळी ५.३०)

मतमोजणी व निकाल जाहीर करण्याचा दिनांक :
२१ डिसेंबर २०२५, सकाळी १०.०० वाजल्यापासून

चंद्रपूर

जिल्ह्यातील घुग्गुस नगर परिषदेची निवडणूक पुढे ढकलण्यात आली.  या निवडणुकीची प्रक्रिया ४ डिसेंबर ते २० डिसेंबर दरम्यान राबविण्यात येणार असल्याची जिल्हाधिकाऱ्यांची प्राथमिक माहिती आहे. 

अकोला

अकोला जिल्ह्यातील बाळापूर नगरपालिकेचा समावेश आहे. नगराध्यक्ष पदाच्या उमेदवाराबाबत न्यायालयीन याचिका प्रलंबित असल्याने निर्णय. नगराध्यक्ष पदासह सर्व २५ जागांची निवडणूक स्थगित करण्यात आल्या आहेत. 

नांदेड

नांदेडमधील मुखेड आणि धर्माबाद नगरपालिकेची निवडणूक पुढे ढकलली. आता, येथील निवडणुकांसाठी २३ तारखेला मतदान होणार असून २४ तारखेला मतमोजणी आहे.

पुणे 

पुणे जिल्ह्याच्या मावळ तालुक्यातील १२ जागांच्या निवडणुका स्थगित करण्यात आल्या आहेत. तळेगाव आणि लोणावळ्यातील प्रत्येकी ६ जागांचा यामध्ये समावेश आहे. आमदार सुनील शेळकेंच्या बंधूच्या जागेची देखील निवडणूक पुढं ढकलली. पुण्यातील मावळ तालुक्यात दोन नगरपरिषदांमधील १२ जागांच्या निवडणुका स्थगित करण्यात आल्यात. 

बारामती 

बारामतीतील नगराध्यक्षांच्या निवडणुकीसह काही प्रभागातील सात जागांचा विचार करून ही निवडणूक प्रक्रिया आता २० डिसेंबर रोज पर्यंत पुढे ढकलली आहे. नगराध्यक्षपदाचाही यामध्ये समावेश असल्याने बारामतीचे नगरपरिषदेचे मतदान थेट २० डिसेंबर रोजी घेतली जाणार आहे.